Ukraina është gati të nënshkruajë një marrëveshje që do t’i jepte SHBA-së akses në mineralet e saj të çmuara dhe të rralla me shpresën për të siguruar mbështetjen e vazhdueshme amerikane për Kievin në luftën me Rusinë. Kjo është bërë e ditur për mediat ndërkombëtare nga zyrtarë të lartë ukrainas, por edhe është konfirmuar nga Sekretari i Thesarit i SHBA-së, Scott Bessent, në përgjigje të një pyetjeje nga gazetarët gjatë një takimi qeveritar.
“Jemi gati të nënshkruajmë marrëveshjen me Kievin për mineralet këtë pasdite, nëse edhe ata janë gati, nuk ka pasur asnjë ndryshim në marrëveshje nga ana jonë”, tha Scott Bessent.
Ministrja e ekonomisë dhe zëvendëskryeministrja e Ukrainës, Yulia Svyrydenko, fluturoi për në Uashington të mërkurën për të ndihmuar në finalizimin e marrëveshjes, sipas dy zyrtarëve të lartë ukrainas që folën në kushte anonimiteti.
Për Ukrainën, marrëveshja shihet si çelësi për të siguruar aksesin e saj në ndihmën ushtarake amerikane në të ardhmen.
“Vërtet, kjo është një marrëveshje strategjike për krijimin e një fondi partner për investime”, tha kryeministri ukrainas Denys Shmyhal në televizionin lokal.
Presidenti i SHBA-së, Donald Trump, tregoi në shkurt se donte qasje në materialet e rralla të tokës së Ukrainës si kusht për vazhdimin e mbështetjes së SHBA-së në luftë, duke e përshkruar atë si rimbursim për miliarda dollarë ndihmë që Uashingtoni i ka dhënë Kievit.
