Një zyrtar i administratës tha se kjo do të thotë që prodhuesit e makinave do të mund të importojnë pa paguar taksa pjesë me vlerë deri në 3.75% të çmimit të shitjes së makinave që prodhojnë në SHBA gjatë vitit të parë, dhe deri në 2.5% në vitin e dytë. Kjo lehtësi do të jetë e vlefshme me efekt prapaveprues që nga 3 prilli, por do të zhduket në vitin e tretë për të nxitur kthimin e prodhimit të pjesëve në SHBA.
Presidenti amerikan Donald Trump pritet të nënshkruajë të martën një urdhër ekzekutiv që do të zbusë ndikimin e tarifave të vendosura për makinat. Ky vendim vjen pas presionit nga kompanitë prodhuese të makinave dhe do të përfshijë kombinimin e disa lehtësirave tatimore me përjashtime nga tarifa doganore të tjera për pjesët dhe materialet.
Ndryshimet në tarifën 25% që Trump vendosi për automjetet do të lejojnë kompanitë të marrin kredi deri në 15% të vlerës së makinave të prodhuara brenda vendit. Këto kredi mund të përdoren për të zbritur vlerën e pjesëve të importuara, duke u dhënë kohë kompanive që të rikthejnë zinxhirët e furnizimit në SHBA.
Një zyrtar i administratës tha se kjo do të thotë që prodhuesit e makinave do të mund të importojnë pa paguar taksa pjesë me vlerë deri në 3.75% të çmimit të shitjes së makinave që prodhojnë në SHBA gjatë vitit të parë, dhe deri në 2.5% në vitin e dytë. Kjo lehtësi do të jetë e vlefshme me efekt prapaveprues që nga 3 prilli, por do të zhduket në vitin e tretë për të nxitur kthimin e prodhimit të pjesëve në SHBA.
Për më tepër, makinat dhe pjesët që preken nga këto tarifa nuk do të jenë më të prekura nga tarifat e tjera të vendosura nga Trump, si ato 25% për mallrat kanadeze dhe meksikane, tarifat për çelikun dhe aluminin (25%), dhe tarifat 10% për shumicën e vendeve të tjera.
Ky ndryshim gjithashtu zgjat përjashtimin nga taksat për pjesët e prodhuara në Amerikën e Veriut që përputhen me rregullat e origjinës të marrëveshjes tregtare SHBA-Meksikë-Kanada (USMCA).
“Nëse e ndërton makinën jashtë vendit dhe e sjell me anije këtu, do të jesh në një disavantazh shumë të madh,” tha zyrtari.
Përsa i përket tarifave për metalet, kompanitë do të paguajnë ose tarifën për makinën, ose atë për çelikun dhe aluminin – cilado që është më e lartë, u shpreh ai.
Pa lehtësira për Kinën
Një zyrtar i Shtëpisë së Bardhë shtoi se kjo lehtësi tarifore nuk do të vlejë për pjesët nga Kina, të cilat do të vazhdojnë të përballen me tarifat më të reja të Trump që arrijnë së paku 145%, përveç atyre që ishin më parë në fuqi.
Trump kishte planifikuar të vizitonte të martën shtetin e Michigan, qendra e industrisë automobilistike në SHBA, për të shënuar 100 ditët e para të presidencës së tij. Ky shtet është shtëpia e tre prodhuesve të mëdhenj të makinave në Detroit dhe mbi 1,000 furnitorëve kryesorë të industrisë.
Zbutja e ndikimit të tarifave për makinat është përpjekja më e fundit e administratës për të treguar fleksibilitet në politikat doganore, të cilat kanë shkaktuar tronditje në tregjet financiare, pasiguri për bizneset dhe frikë për një ngadalësim të fortë ekonomik./Reuters
