Policia e Vaut të Dejës ka goditur dy raste të tentativës për kultivim të bimëve narkotike.
Autoritetet policore raportojnë se në dy zona të fshatit Vig janë gjetur 2200 bimë narkotike kanabis sativa të kultivuara në tokë dhe 578 fidanë narkotikë kanabis sativa të kultivuar në kubikë.
Policia thotë se parcelat me kanabis janë zbuluar me përdorimin e dronit, bazuar dhe në informacionet e siguruara nga inteligjenca policore. Një pjesë e bimëve dhe e fidanëve janë sekuestruar në cilësinë e provës materiale, ndërsa pjesa tjetër është asgjësuar me djegie.
Në lidhje me këto parcela me kanabis, nuk ka asnjë të arrestuar, teksa Policia thotë se vijon puna për identifikimin dhe nxjerrjen përpara përgjegjësisë penale të autorit/ve të kultivimit të bimëve dhe fidanëve.
Materialet procedurale i kanë kaluar Prokurorisë së Shkodrës për veprime të mëtejshme.
