Ndeshja e Ligës së Kampionëve mes Barcelonës dhe Interit të mërkurën raportohet se është në rrezik të pezullimit për shkak të ndërprerjes së energjisë elektrike që ka shkaktuar kaos në Spanjë, Portugali dhe një pjese të Francës.
Interi do të fluturojë për në Barcelonë nesër, 24 orë përpara ndeshjes së parë të gjysmëfinales evropiane kundër klubit të La Ligës. Megjithatë, udhëtimi i tyre mund të ndikohet nga ngarkesa të mëdha në fluturime. Aeroportet spanjolle janë prekur keq nga ndërprerjet, me vonesa prej disa orësh aktualisht.
Firma analitike e aviacionit Cirium ka raportuar se pritej të kishte 3,005 nisje dhe 3,005 mbërritje në aeroportet spanjolle, me Madridin që pritet të shohë numrin më të madh të fluturimeve, e ndjekur nga Barcelona.
Shumë prej këtyre fluturimeve mund të vonohen ose anulohen, duke ndikuar potencialisht te Inter. Sipas Daily Express Interi mund të mos jetë në gjendje të udhëtojë për në Barcelonë nesër nëse problemi vazhdon. Kjo do të rrezikonte shtyrjen e ndeshjes së Ligës së Kampionëve mes dy klubeve.
Nëse ndeshja shtyhet, riprogramimi i ndeshjes do të ishte i ndërlikuar. Ekziston mundësia për ta shtyrë atë për një ditë deri të enjten, por të dyja skuadrat do të luajnë ndeshjet e ligës 48 orë më vonë. Barça përballet me Real Valladolid në La Liga të shtunën në mbrëmje, ndërsa Interi pret Veronën në Serie A.
Ndeshja e kthimit është planifikuar të zhvillohet të martën e ardhshme, ndërsa Barça nuk ka një mesjavë të lirë deri në javën që fillon më 19 maj. Finalja e Champions League do të luhet në Mynih më 31 maj.
