Në lidhje me sherrin e regjistruara dy ditë më parë në fshatin Ostren të Bulqizës, gjatë një takimi elektoral të demokratëve, Policia ka referuar materialet në SPAK edhe për 33-vjeçarin Kalosh Murra nga Shupenza, i cili është punonjës i Bashkisë së Bulqizës në sektorin e ndarjes së ndihmës sociale.
Ai është kallëzuar nga drejtuesi politik i PD-së Xhelal Mziu, teksa akuzohet për veprën penale “Pengimi i subjekteve zgjedhore”
“Specialistët për Hetimin e Krimeve të Komisariatit të Policisë Bulqizë referuan materialet në SPAK, për veprën penale “Pengimi i subjekteve zgjedhore”, për shtetasin K.M., 33 vjeç, banues në Shupenzë, pasi ndaj tij me datë 25.04.2025, ka bërë kallëzim shtetasi Xh. M., 58 vjeç, banues në Tiranë, i cili pretendon se gjatë takimit elektoral të zhvilluar nga subjekti politik “Partia Demokratike”, në fshatin Ostren, shtetasi K.M., indimidonte pjesëmarrësit në takim” – njofton Policia.
Një ditë më parë, Policia e Bulqizës procedoi penalisht edhe Xhelal Mziun dhe nipin e tij, të cilët ishin kallzuar nga Kalosh Murra, me pretendimin se e kishin dhunuar.
Xhelal Mziu pretendoi se Kalosh Murra po intimidonte pjesëmarrësit, ku një pjesë ishin larguar pas kërcënimeve dhe një pjesë tjetër i kanlë shprehur shqetësimin për heqjen e ndihmës ekonomike.
Më pas, sipas deputetit demokrat, Kalosh Murra ka komikuar me përfaqësues të Partisë Socialiste dhe në vendin e ngjarjes kanë shkuar Jeton Dani, babai i kandidatit për deputet të PS-së Murat Dani dhe zyrtarë të tjerë të PS, të cilët kanë ushtruar dhunë ndaj kryetarit të FRPD, si dhe ndaj kreut të PD-së Bulqizë, Shaqir Manjanit.
