Gjykata e Posaçme ka shpallur fajtor për kryerjen e veprës penale “Korrupsioni pasiv i personave që ushtrojnë funksione publike”, kryer në bashkëpunim, ish-kryeinspektorin e INUV-it pranë bashkisë së Elbasanit, Andri Mehja.
Ai është dënuar me 3 vite burgim, ku nga gjykimi i shkurtuar i është ulur dënimi në 2 vite burgim, por sërish edhe ky dënim i është konvertuar në 4 vite shërbim prove.
Gjithashtu, Andri Mehja i është dhënë dhe dënimi plotësues me heqjen e së drejtës për të ushtruar funksione publike për 5 vjet.
I njëjti dënim si i Andri Mehjas është dhënë edhe për ish-punonjësin e INUV në Elbasan, Gentian Bako, të cilit 2 vite burgim ntë dhëna nga gjykimi i shkurtuar, i janë konvertuar në 4 vite shërbim prove.
Andi Mehja ka qenë drejtuesi i Inspektoriatit Ndërtimor Urbanistik Vendor në Bashkinë e Elbasanit dhe u denoncua nga emisioni “Stop” në lidhje me një ngjarje ku një biznesi në qytetin e Elbasanit i kishin vënë një gjobë për ndërtimin e një tende pa leje
Me anë të një sekseri, Andri Mehja, i ka kërkuar qytetarit një ryshfet prej 2 milionë e gjysmë Lekë për të reduktuar masën e gjobës nga 17 milionë në 5 milionë Lekë.
Denoncimi u bë në muajin Prill të vitit të kaluar dhe Andri Mehja u shpall në kërkim. Ai u arrestua 6 muaj më vonë, në Tetor, në pikën kufitare të Kapshticës.
Andri Mehja njihet në Elbasan si vëllai i Orel alias Aurel Mehjas, dhëndrit të ish-kryebashkikaut të Elbasanit, Qazim Sejdini.
Orel (Aurel) Mehja u arrestua në muajin Mars për veprën penale “Kanosja për shkak të detyrës”, pasi kërcënoi një efektiv policie.
