Autoriteti i Komunikimeve Elektronike dhe Postare i është drejtuar me një shkresë Komisionit Qendror të Zgjedhjeve, ku i kërkon t’i vendosë në dispozicion një kopje të kontratës së lidhur ndërmjet këtij institucioni dhe kompanisë postare DHL.
Ky komunikim shkresor nga ana e AKEP-it vjen pas shqetësimit të 2 partive kryesore, PS dhe PD, lidhur me parregullsitë në shpërndarjen e zarfeve me fletët e votimit tek shqiptarët që do të votojnë nga jashtë me postë.
AKEP kërkon po ashtu që t’i bëhet me dije nga ana e KQZ-së në lidhje me çdo problematikë të hasur gjatë zbatimit të kontratës për këto objekte postare.
Kërkesa e plotë e AKEP:
“Autoriteti i Komunikimeve Elektronike dhe Postare (AKEP), bazuar në përcaktimet e ligjit nr. 46/2015 “Për shërbimet postare në Republikën e Shqipërisë”, është organi mbikëqyrës i sektorit të shërbimeve postare në RSH dhe ndjek zbatimin e detyrimeve ligjore dhe nënligjore nga çdo subjekt që ofron shërbime postare, përfshirë trajtimin e ankesave të përdoruesve të këtyre shërbimeve në rolin e palës dërguese dhe/ose palë marrëse të objekteve postare.
Nisur nga ankesat e përcjella në AKEP si dhe për shkak të interesit të lartë në lidhje me procesin e shpërndarjes së objekteve postare ndërkombëtare për zgjedhjet parlamentare 2025, që përfshin jo vetëm KQZ por edhe qytetarët shqiptarë në rolin e palës marrëse dhe njëkohësisht të palës dërguese të këtyre objekteve postare ndërkombëtare, në mënyrë që AKEP së ushtrojë kompetencat në mbrojtje të interesave të përdoruesve, kërkojmë nga ana juaj:
Depozitimin e një kopje të kontratës së lidhur ndërmjet KQZ dhe DHL, si dhe
Të na vini në dijeni në lidhje me çdo problematikë të hasor gjatë zbatimit të kontratës për këto objekte postare
Duke ju falënderuar për bashkëpunimin”.
