Edi Rama, gjatë një takimi në Skrapar në kuadër të fushatës elektorale, ka sulmuar partitë e reja, që sipas tij, luftojnë vetëm për një karrike në Kuvend.
Rama tha se ata “e bëjnë detin kos”, duke iu referuar premtimeve të tyre, teksa sipas kryeministrit, ata kanë vetëm moshën e reja.
Lideri i socialistëve përmendi edhe Lulzim Bashën që sipas tij, është i vetmi koalicion me vetëm një parti.
Rama: Janë disa zogj të vegjël që kanë dalë, jo bëhet, jo s’bëhet, jo mundet, jo s’mundet, jo bashkë jo veç. Ata mua më heqin mallin e Sudes të Vehbiut dhe të Rrapush Xhaferrit. Ta bëjnë detin kos. Jepu votën e tyre dhe këtu nuk do të ketë më korrupsion, nuk do ketë më padrejtësi, nuk do ketë më çmimet të lartë, nuk do ketë më asnjë problem. Vetëm jepini votën që të kapin ndonjë karrige në parlament. Thonë jemi të rinj. Të rinj janë vetëm në moshë. Shikoni si marrin krushqit dhe i vënë në listat, se vetë janë në listat e hapura.
Përveç atyre është dhe Luli. Ai të paktën është koalicion tekpull. Ai është i vetmi koalicion në histori që është tekpull. Kur e pyesin sa parti janë në koalicion, thotë: hyni në internet dhe e gjeni vetë. Ai është shumë i madh, do të na mungojë.
