Emisioni “Në Shënjestër” ka trajtuar mbrëmjen e sotme krimin zgjedhor, cënimin e votës së lirë në Shqipëri, referuar rasteve të publikuara në media, disa prej të cilave janë pjesë e hetimit të SPAK.
Ndryshe nga vitet e shkuara, për parandalimin e krimit zgjedhor gjatë zgjedhjeve parlamentare të 11 majit, SPAK është angazhuar për identifikimin dhe parandalimin e ndikimit të krimit të organizuar dhe korrupsionit të funksionarëve shtetërorë dhe subjekteve private në procesin zgjedhor për të siguruar një proces të lirë dhe të ndershëm zgjedhor.
Rasti i ish-deputetit të PS, Jurgis Çyrbja është një prej tyre ku nga të dhënat e përgjimeve të SkyECC, rezultoi se emri i tij ishte i diktuar nga eksponentë të krimit të organizuar, të cilit siç edhe në bisedat e zbërthyera në aplikacionin SkyECC ai i kishte shërbyer në forma të ndryshme.
Devotshmëri që e kishte shpërblyer edhe renditjen në listë të sigurt të kandidatëve për deputetë të Qarkut Durrës, aty ku krimi kishte shtrirë tentakulat e veta dhe bënte ligjin, duke vendosur edhe se kush do shkonte në parlament dhe kush jo.
“Tashi sa e mbylla muhabetin tënd se kam 3 orë me atë, po mos fol me njeri se na prishin pun. Se ja kërkova personalisht. Do ja çoj ashtu tha, normal ti i pesti, Liri i shtati”, thotë Altin Hajri, një nga krerët e grupeve kriminale në zonën e Shijakut, sipas të dhënave të dosjes hetimore ndaj ish-deputetit Jurgen Çyrbja i cili shprehet se tani ndjehet i qetë shpirtërisht pas këtij lajmi.
Në dosjen hetimore përmendet dhe një emër tjetër, Julian Meçaj, ish-anëtar i bandës së Durrësit, i interesuar që Jurgis Çyrbja, për të cilin mesa duket se krimi në zonë ka hapur një garë se kush e kush ta rendisë sa më lart në listën e sigurtë.
Sipas dosjes hetimore, Meçaj gjatë periudhës parazgjedhore të 25 Prillit 2021, mban raporte të ngushta me deputetin Jurgis Çyrbja.
Dhe ashtu siç pritej Jurgis Çyrbja nuk ka harruar të falenderojë bamirësin e tij, të cilit i tregon se sa i qetë ndihet shpirtërisht tani që mori këtë lajm.
“Ok vëllai. Rrofsh, je i madh. Na ngrite moralin se na kishte ik mendja”, thotë Çyrbja, referuar përgjimeve të bisedave në SKYECC.
“Do pimë kafe nesër me Gjushin”- Si ndikoi Astrit Avdylaj në zgjedhjen e Ilir Ndraxhit deputet në Durrës
“Në Shënjestër” solli në vëmendje detaje nga dosja hetimore 339, ku në përgjime ka dalë dhe emri i një prej krerëve të bandës së Shijakut, Astrit Avdylaj.
Avdylaj, sipas përgjimeve, është angazhuar në procesin zgjedhor të 2017 për të mbledhur sa më shumë vota për PS.
Në një komunikim me drejtorin e Ujësjellësit në Shijak, Avdylaj tregon se ndodhet në shoqëri me Elton Arbanën (kryetari i PS në Shijak në kohën e përgjimeve dhe aktualisht kandidat për bashkinë e Shijakut) dhe nga biseda shihet qartë se paracakton dhe se kush do jetë në listën e sigurtë të Partisë Socialiste në Durrës, ai i Ilir Ndraxhit.
Astrit Avdylaj, kreu i grupit kriminal Avdylaj në Shijak, telefonon kreun e bashkisë së Shijakut për të lënë një takim me të, Vangjush Dakon kryebashkiakun e Durrësit, si dhe me një kandidat me prespektivë dhe të ardhme ‘Liri’ (Ilir Ndraxhi). Një person që grupi kriminal Avdylaj kërkon të caktohet si kandidat i PS-së për deputet.
“Nesër kemi një takim në orën 10 të mëngjesit. Unë, ti, Gjushi, Liri, vllai i Lirit, dhe Jupi do pimë një kafe nesër në Durrës në orën 10, pranaj të kam mor sot me i fjalë”, thotë Astrit Avdylaj në bisedën telefonike.
Në një tjetër telefonatë kreu i grupit kriminal të Shijakut, interesohet pranë vëllait të Ilir Ndraxhit, nëse kryeministri Rama e ka marrë në telefon.
Pas bisedës që mesa duket Avdylaj ka bërë që Ilir Ndraxhi të jetë në listë të sigurtë në Qarkun e Durrësit, në zgjedhjet parlamentare të vitit 2017.
Astrit Avdylaj telefonon vëllain e deputetit në perspektivë dhe e pyet atë nëse vëllai i tij, ka marrë ndonjë telefonatë (nga lart) për t’u konfirmuar si kandidat i PS.
Më tutje Astriti zotohet se ata do të punojnë shumë fort që të mund të surprizojnë të gjatin me një rezultat pozitiv 10 me 0.
Disa ditë më vonë Ilir Ndraxhi konfirmohet si kandidat i PS për Durrësin duke përfaqësuar interesat e klanin kriminal në këmbim të suportit maksimal ndaj fushatës së PS në Durrës.
“Ok unë po pres. Ne e kena në xhep. Ai më tha mua. Ne thjesht po presim, siç më thanë.
Se duhet të jemi edhe shumë të nerum nga ai sipër që duhet të na shohi me një kështu, e ke parasysh.
Ti japim një 10 me 0 që edhe ai vetë të habitet”, thotë Avdylaj./ Në Shenjestër
