Emisioni Investigativ ‘Tak Fak’, solli këtë të hënë një denoncim të çuditshëm që ka mbërritur në redaksi nga qytetari Petraq Karpuzi, nga Bilishti i cili ndërsa priste që në banesë t’i vinte celulari nga Gjermania që i kishte dhuruar nusja e djalit, i erdhi vetëm kutia bosh.
Gazetarja e ‘Tak Fak’ shkoi në Drejtorinë e Përgjithshme të Postës Shqiptare për të sqaruar këtë rast, ku u takua me përgjegjësin e sigurisë pranë këtij institucioni, Xhevahir Halipajn.
Zoti Halipaj ka shfaqur për gazetaren e emisionit pamjet e kamerave të sigurisë që tregojnë mbërritjen e pakove në Shqipëri.
“Me ardhjen e ankesës suaj Drejtoria e Sigursë në Postën Shqiptare, brenda 24 orëve ka bërë investigimin e saj, nga ku na del se se ka bërë gjurmimin e rastit, nga hyrja në Aerportin e Rinasit deri në destinacionin e mbërritjes. Nga verifikimi dhe nga kamerat filmike del se ky është thesi, që ka ardhur nga Rinasi në Cargo, në filialin e qendrës Tranzit. Pra pako që ne kërkojmë është në këtë thes dhe këtu shikojmë edhe pakot që janë të dëmtuara”, tregon ai.
Halipaj ka treguar më pas pamjet e kamerave të tjera që tregojnë pakon që supozohej të mbante telefonin e dërguar për zotin Petraq Karpuzi në Bilisht.
“Tani po kalojmë te pakoja që ju interesoheni. Ky është objekti, këtu ku është shënuar vetëm adresa e marrësit dhe dërguesit, fshati, qyteti… Nuk ka të deklaruar, as vlerën, as telefonin, as llojin e telefonit, as peshën. Që si rregull duhet ta ketë. Ky është objekti që interesoheni. Duket shumë qarta nga ana e punonjëses. Verfikohet nga kamera që është objekt i dëmtuar dhe që këtu duket që është i hapur. Po shikohet procesverbali. Që po plotëson punonjësja. E kemi dhe këtu Posta mbërritje ka ardhur 204 gram. Pesha në nisje nuk është deklaruar. Si rregull duhet ta bënte posta në Gjermani. Detyra e kësaj punonjëse është të mbajë një procesverbal. Ta amballazhojë dhe ta vulosë me plumçe”, tha ai.
Duke folur për mundësinë e rikuperimit të dëmit, ai tha se në këto kushte dërguesi duhet të ankohet në Gjermani, nga ku është bërë edhe dërgesa.
“Në këto kushte duhet bërë një reklamim. Shteti gjerman pastaj e shikon të arsyeshme apo jo të bëjë dëmshpërblim”, tha Halipaj.
