Edi Rama ka zhvilluar pasditen e kësaj të diele një takim me gratë dhe vajzat në Kamëz në kuadër të fushatës elektorale për zgjedhjet parlamentare të 11 Majit, ku “refreni” i fjalimit të tij ka qenë i njëjtë, se burrat shqiptar sipas tij janë “çyrykë”.
Ndërkohë, ai nuk la pa “mësuar” edhe gratë dhe vajzat socialiste se si të bëjnë vota për të, ku ndryshe nga herët e tjera, ku i mësonte që të kapnin “dashnorë” demokratë, këtë herë Rama u tha që të shoqërohen me gra demokrate dhe t’i bindin ato të votojnë për të.
Rama: Për 11 majin, nuk duhet të mjaftoheni me çfarë shihni dhe kuptoni sot por çdo ditë dhe orë duhet të bëni përpjekje për të shtuar radhën e votave të sigurta për PS-në nga gratë. Duhet të punoni dhe bashkëpunoni me gratë demokrate, të cilat e kuptojnë shumë mirë sepse kanë shumë më të shpejtë kalimin nga politika në realitet, nuk e kanë si burrat. Burrat kur janë tifozë janë çyryk, nuk shohin. Shohin ngjyrën e fanellës, ulen pijnë raki dhe bëjnë tifo. Por politika nuk është një ndeshje futbolli, zgjedhjet nuk janë një stadium dhe vota nuk është një biletë.
Nëse ka vajza që kanë simpatizantë demokratë, duhet t’ju bëjnë provën e karakterit për në Europë apo në kënetë. Nëse të thotë hajde në kënetë, si i thua ti? Ti e kupton që ai nuk është mirë, i thua hajt se po të marrë nesër dhe të shkoj të mbytet vetë. Nuk e kuptoj dot si mundet një njeri normal të çohet në mëngjes, të vishet dhe të zbukurohet dhe të mbajë radhë për të çuar votën në kënetë. Më mirë të rri në shtëpi apo te kafja dhe të presi sa të jetë diferenca. Si mund të votosh kënetën, nuk e kuptoj. Është mision human t’i ndihmosh akoma ata që janë të verbër që të hapin sytë që nuk mundet kjo punë të shkojë kështu.
