Detaje të reja vijojnë të dalin nga vrasja tragjike e Ilaria Sulës.
Siç raportojnë mediat italiane, së fundmi ka reaguar dhe një djalë, të cilin 22-vjeçarja shqiptare e kishte njohur në Tinder.
Ai ishte pikërisht djali që Mark Antony Samson e përdori për të kamufluar krimin, të cilin e përmendte në mesazhet e Ilarias si personin me të cilin kishte fjetur. Po djali ka rrëfyer se me Ilarian kishte folur shumë pak me mesazhe, ndërsa nuk i kishte dëgjuar kurrë as zërin, e jo më të takohej me të.
“Ka qenë një njohje në fillim. Ne folëm pak dhe ajo më tregoi se ishte duke u ndarë nga një lidhje. Por vetëm kaq. Më pas, shoqet e Ilarias më telefonuan. Aty e kuptova që dikush u përpoq të më përfshinte dhe mua”, u shpreh i riu.
22-vjeçarja shqiptare Ilaria Sula u vra në mënyrë tragjike nga ish i dashuri i saj. 23-vjeçari filipinas tregoi se i mori jetën Ilarias në shtëpinë e tij dhe më pas e futi trupin e pajetë në një valixhe, duke e hedhur në një zonë pyjore jashtë Romës.
Më pas ai përdori telefonin e 22-vjeçares për të fshirë gjurmët, duke u hequr si ajo dhe duke i thënë shoqeve të shqiptares se kishte shkuar në shtëpinë e një djali tjetër pranë Napolit.
