Bombat izraelite goditën spitalin e qytetit të Gazës gjatë orëve të natës, raporton Al Jazeera. Sulmet ajrore thuhet se shkatërruan dhomën e urgjencës, hyrjen kryesore dhe objektin që përmban oksigjen mjekësor për pacientët e kujdesit intensiv.
Sulmi vjen pasi ushtria izraelite lëshoi urdhra të reja evakuimi dje në mbrëmje për banorët e kampit të refugjatëve Nuseirat në qendër të qytetit dhe Khan Younis në jug, pasi kapi tri raketa që vinin nga Rripi.
Mjekët dhe infermierët u përpoqën për të nxjerrë qindra pacientë nga objekti në mes të natës.
Kolegët tanë në Al Jazeera Arabic raportojnë se forcat izraelite kanë bombarduar Spitalin Arab al-Ahli në qytetin e Gazës ndërsa pacientët po evakuoheshin”, raporton Al Jazeera.
Në mediat sociale qarkulluan imazhe ku tregojnë njerëz që transportohen me barela nëpër rrugë. Dhjetra palestinezë, duke përfshirë gra dhe fëmijë, u panë gjithashtu duke ikur nga një oborr brenda spitalit ku ata kishin kërkuar strehim. Aktualisht nuk dihet ende nëse ka viktima.
Al-Ahli – një strukturë e vogël mjekësore para luftës – është tani i vetmi spital që ende funksionon në qytetin e Gazës pas shkatërrimit të kompleksit mjekësor Al-Shifa dhe spitaleve në pjesën veriore të Rripit.
Në deklaratën e saj, zyra e mediave qeveritare e drejtuar nga Hamasi dënoi sulmin duke e cilësuar një krim të tmerrshëm nga Izraeli.
Ushtria izraelite nisi një fushatë për të shkatërruar Hamasin në përgjigje të një sulmi të paprecedentë ndërkufitar më 7 tetor 2023, ku rreth1200 izraelitë u vranë dhe 251 të tjerë u morën peng.
Më shumë se 50,933 njerëz janë vrarë në Gaza që prej asaj kohe, sipas ministrisë së shëndetësisë të Hamasit.
