Një fenomen i pazakontë është bërë së fundmi viral në rrjetet sociale. Ngado mund të shihni imazhe të kthyera në personazhe të animuara. Gjithçka është frymëzuar nga studio e famshme japoneze e filmave të animuar, Ghibli.
Fenomeni u përhap nga Chat Gpt. Platforma e inteligjencës artificiale u mundëson përdoruesve realizimin falas të imazheve.
Por gjerat falas kanë edhe kosto. Ekspertë të sigurisë kanë ngritur shqetësimin, se fenomeni nuk ka vetëm anët argëtuese. Sipas specialistëve në momentin që fotot i jepen këtyre platformave online, humbet kontrollin mbi to. Por për çfarë mund t’i përdorë Chat Gpt imazhet tona?
“Pasi fotot tona ngarkohen në platforma të ndryshme të AI, ato fillimisht përdoren për të trajnuar. Nëse 100 shqiptarë i dërgojnë foto për të marrë pas një imazh ilustrues, në këtë forma platforma kupton tiparet e shqiptarëve. Kupton sesi shqiptarët janë, mimikat e fytyrës. Dhe kur AI i kërkohet një video me shqiptarë, normalisht kur është përdorur në masë, AI do jetë më i trajnuar për të nxjerrë një foto që i përshtatet më shumë shqiptarëve”, thekson eksperti Elton Heta.
Përdorimi në masë i këtij trendi sjell ekspozimin e të dhënave personale, vendndodhjes, apo imazheve sensitive, të cilat mund të jenë shumë private.
“Anët më të rrezikshme nëse ne pas 10 vitesh kërkojmë më gjenero një foto apo video me shqiptarë në autobus ose në një kafene, të shohim veten tonë në këtë video. Pra të përdoret imazhi jonë pa lejen tonë. Dhe në fakt disa rrjete sociale me rregullat e tyre kërkojnë miratimin tonë për përdorimin e imazheve tona. META kërkon leje për imazhet tona në rrjetet sociale për reklama, por edhe për trajnimin e inteligjencës artificiale”, tha ai.
Chat Gpt është një platformë serioze, megjithatë sipas ekspertëve situata bëhet më shqetësuese, kur përdoren aplikacione të panjohura për të krijuar imazhe animacioni. Rekomandohen që të mos ngarkohen në këto platforma fotot me përmbajtje të ndejshme dhe shumë private dhe mund të përdoren në raste të tjera pa lejen tuaj.
“Këto të dhëna mund të keqpërdoren. Ku ne mund ta shohim veten në gjenerimet e filmave të animuar, të videove të ndryshme që ne ia kërkojmë AI në një moment të dytë. Çështja më problematike është kur ne përdorim foto që janë të jetës sonë të përditshme. Foto që nuk duam t’i bëjmë publike dhe problem më serioz është kur foto gjenerohen nëpërmjet platformave që nuk janë shumë të njohura dhe janë të palëve të treta. Duke mos parë se sa serioze është kompania që ne i ngarkojmë këto foto rrezikojmë më tepër të dhënat tona, identitetin tonë dhe rreziku për t’u keqpërdorur bëhet më i lartë. Këto të dhëna nga kjo platformë na rrezikon, sepse përveç fotove që gjenerohen ndryshe, mund të ruajë edhe fotot tona origjinale në serverat e tyre që mund të keqpërdoren më mbrapa për shantazh, apo krijim të llogarive në rrjetet sociale sikur jemi ne”, tha ai.
Ndërsa trendi vijon të jetë i përhapur dhe rrjetet sociale janë pushtuar me imazhe të animuara, përfshirë edhe personat publikë, ekspertët nxjerrin në pah edhe anët pozitive të këtij fenomeni.
“Videot që do gjenerohen në të ardhmen nga inteligjenca artificiale do u përshtaten më shumë shqiptarëve”, tha ai.
E ndërsa shijojmë magjinë e studio Ghibli, me rëndësi është të sjellim në vëmendje se privatësia është e rëndësishme. Përdoruesit këshillohen të jenë të kujdesshëm me aplikacionet që zgjedhin për të realizuar këto imazhe. Ato duhet të jenë të njohura dhe të verifikuara./abcnews
