Janë zbardhur detaje të reja nga aksioni i ekzekutuar në orët e para të mëngjesit të sotëm nga oficerët e BKH-së dhe efektivët e Policisë së Shtetit, ku me urdhër të SPAK u ushtrua kontrolle në disa banesa dhe biznese.
Burime bëjnë me dije se kontrolle janë ushtruar në zyrat e biznesit të Nazif Bajrami, pronar i kompanisë “Bajrami N” dhe një biznesmen i njohur fushën e ndërtimit në Elbasan, i cili ka fituar një sërë tenderash nga institucionet publike.
Po ashtu, kontrolle janë ushtruar edhe tek Marenglen Çoku, administrator i ekipit të Futbollit të A. F. Elbasanit, i cili është dhe pronar i kompanisë “ÇOKU M & E”.
Të njëjtat burime konfirmojnë se oficerët e BKH-së kanë ushtruar kontrolle dhe në banesën e drejtorit të Ujësjellës Kanalizimeve Elbasan (UKE), Luan Tabaku.
Mësohet se nga zbërthimi i bisedave në aplikacionin e enkriptuar “Sky Ecc”, ata kanë rezultuar të lidhur me grupin kriminal të drejtuar nga Suel Çela, ku ky i fundit vijon të jetë ende në kërkim nga SPAK. Burime bëjnë me dije se Prokuroria e Posaçme po heton tendera publikë të cilët dyshohet se janë përfituar nga krimi i organizuar përmes personave të tretë.
Urdhër-kontrollet janë firmosur nga dy prokurorët e SPAK, Vladimir Mara dhe Altin Dumani, dhe janë miratuar nga GJKKO, teksa janë sekuestruar celularë dhe sende të tjera, shuma parash dhe dokumentesh të ndryshme me vlerë të rëndësishme për hetimin e SPAK.
Opozita, përmes Belind Këlliçin, denoncoi se SPAK kishte urdhëruar kontroll edhe tek tregu agro-ushqimor i Suel Çelës, por ky urdhër nuk ishte zbatuar nga Policia e Shtetit.
“Narko-drejtori ka refuzuar të zbatojë një urdhër të Prokurorisë së Posaçme për të kontrolluar tregun e Elbasanit, bazën e aktiviteteve të paligjshme të bandës kryesore të Ramës dhe PS në rajon, grupit të Suel Çelës. Ky është një veprim jo vetëm në kundërshtim me ligjin, por edhe dëshmi e dorëzimit të shtetit në duart e krimit të organizuar. Rama e shtyn dhe e frymëzon SPAK kur ka nevojë, dhe i vihet kundra, e poshtëron kur i prek interesat. Ky është standardi i tij me drejtësinë dhe Europën.” – u shpreh Këlliçi.
Gjithsesi, pas denoncimit të PD-së, reagoi Policia e Shtetit e cila e mohoi kategorikisht që të kishte refuzuar urdhrin e Prokurorisë së Posaçme.
“Policia e Shtetit shpreh indinjatën e thellë për përpjekjet e vazhdueshme të përfaqësuesve të subjektit politik “Partia Demokratike” për të përbaltur punën e Policisë së Shtetit, punë e cila vlerësohet përditë nga partnerët dhe agjencitë ligjzbatuese më prestigjioze ndërkombëtare. Deklarata e sotme nuk është asgjë tjetër veçse vijim i përpjekjeve të përditshme, duke sajuar e akuzuar pa të drejtë qindra mijëra punonjës të Policisë së Shtetit dhe stafet drejtuese të tyre.
Policia e Shtetit, siç ka treguar besueshmëri e profesionalizëm, përkushtim e vendosmëri përkrah partnerëve në luftë kundër krimit, edhe me agjencitë ligjzbatuese brenda vendit ka të njëjtin standard dhe marrëdhënie mjaft të mira në interes të zbatimit të ligjit. Sqarojmë opinionin publik se Policia e Shtetit nuk ka refuzuar asnjëherë të përmbushë detyrat e ngarkuara sipas ligjeve në fuqi, por i ka zbatuar dhe përmbushur ato me profesionalizëm e konform ligjit.” – thuhet në komunikatën e Policisë.
Në nëntor të vitit të kaluar, SPAK goditi bandën e Suel Çelës, duke lëshuar 21 masa sigurie në total, por kreu i saj, arriti t’i shpëtonte sërish vënies përpara ligjit, pasi nuk u arrit të arrestohej.
Banda e drejtuar prej tij akuzohet për një sërë ngjarjesh kriminale në Elbasan, si dhe për trafik të lëndëve narkotike nga vendet e Amerikës Latine drejt Europës.
