Edhe Prokuroria e Posaçme (SPAK) ka përgënjeshtruar deklaratën e Belind Këlliçit, ku sipas këtij të fundit, Policia e Shtetit kishte refuzuar urdhrin për të ushtruar kontroll në tregun agro-ushqimor në Elbasan, në pronësi të babait të Suel Çelës.
Në një përgjigje të shkurtër për mediat, SPAK thotë se për veprimet hetimore të kryera në Elbasan ka patur bashkëpunimin dhe mbështetjen e plotë të Policisë së Shtetit dhe të Policisë vendore.
“Sot, më datë 10 Prill 2025, Struktura e Posaçme kundër Korrupsionit dhe Krimit të Organizuar (SPAK) ka kryer disa veprime hetimore në qytetin e Elbasanit, për të cilat ka pasur bashkëpunimin dhe mbështetjen e plotë të Policisë së Shtetit dhe të Drejtorisë së Policisë Vendore të Elbasanit.” – thuhet në përgjigjen e SPAK.
Mëngjesin e sotëm, me urdhër të SPAK, oficerët e BKH-së dhe efektivët e Policisë ushtruan kontrolle në 4 banesa dhe në një zyrë. Më konkretisht, kontrollet u ushtruan tek Nazif Bajrami, një biznesmen i njohur fushën e ndërtimit në Elbasan, i cili ka fituar një sërë tenderash nga institucionet publike, si dhe tek Marenglen Çoku, administrator i ekipit të Futbollit të A. F. Elbasanit. Po ashtu, u ushtrua kontroll edhe tek banesa e drejtorit të Ujësjellës Kanalizimeve Elbasan (UKE), Luan Tabaku.
Nga zbërthimi i bisedave në aplikacionin e enkriptuar “Sky Ecc”, ata kanë rezultuar të lidhur me grupin kriminal të drejtuar nga Suel Çela, ku ky i fundit vijon të jetë ende në kërkim nga SPAK. Burime bëjnë me dije se Prokuroria e Posaçme po heton tendera publikë të cilët dyshohet se janë përfituar nga krimi i organizuar përmes personave të tretë.
