Kryetari i Partisë Demokratike Sali Berisha prezantoi sot kandidatët “PD-Aleanca për Shqipërinë Madhështore” në Malësinë e Madhe. Gjatë fjalës së tij kryedemokrati paraqiti programin e PD-së, i cili tha se është programi më i mirë dhe më realist që ka njohur Shqipëria dhe shqiptarët.
“Po ta shohësh në shumë anë, kjo Malësi ka patur shumë anë madhështore, historinë e saj me ngritjen e flamurit për herë të parë në trojet shqiptare. Por cilido që do të njohë në thellësi këtë malësi, dhe lexon e studion për të, do të gjejë se gjëja më madhështore që ka kjo malësi është familja shqiptare, familja e saj”, tha Berisha.
Sipas Berishës, shumë shqiptarë janë larguar nga vendi për shkak të varfërisë dhe papunësisë. Berisha premtoi se nuk do të ketë pension nën 200 euro.
“Problemi është se 57% e pensionistëve në Shqipëri marrin një pension nga 67 euro maksimumi 168 euro. Pra, marrin një pension nën 200 euro. Të gjithë pa përjashtim nga vitet e punës, nga çfarëdo lloj faktori tjetër do të marrë 200 euro”, tha Berisha.
“200 euro do marrë çdo i papunë, çdo person në ndihmë ekonomike. Dhe jo vetëm kaq. Secili prej tyre do të ketë kartën e konsumatorit. Të gjitha mallrat që blejnë për ushqime dhe për gjërat bazë do t’i blini më lirë se të tjerët. 20% më lirë. Tvsh-në do ua kthejmë dhe do merrni 450 euro në vit, sipas llogarive të sotme, dhe sa të shkojë për ushqimet pa tvsh”, tha më tej Berisha.
Berisha tha se Shqipëria do ketë listën e rimbursimit të plotë të ilaçeve që ka republika italiane.
Kryedemokrati u shpreh se “rroga minimale nuk do jetë nën 500 euro”.
Sa i takon naftës Berisha tha se “brenda 100 ditëve të para barra fiskale mbi naftën zbret në nivelin e Maqedonisë dhe Kosovën”.
“Kosova e merr naftën nga Durrësi, e shet 40% më lirë në Prishtinë. Kjo merr fund. Nafta nuk do mund të shitet në Shqipëri kurrë më shumë plus minus me çmimin që do të shitet në Kosovë, Maqedoni dhe në vende tjera”, tha Berisha.
