Personi që shihni në foton e mëposhtme është biznesmeni 52-vjeçar, Marsel Shega alias Bujar Shega nga Elbasani, i konsideruar si “truri financiar” i bandës së Suel Çelës. Ai u ekstradua ditëmn e sotme nga nga Milano e Italisë, pas bashkëpunimit të Interpol Tirana me homologët e Romës.
Marsel alias Bujar Shega ishte shpallur në kërkim ndërkombëtar nga SPAK në kuadër të operacionit, ku u godit banda e Suel Çelës, teksa akuzohet për trafikim të lëndëve narkotike dhe pastrim të parave, kryer në kuadër të grupit të strukturuar kriminal.
“Në vitin 2024, Gjykata e Posaçme e Shkallës së Parë për Korrupsionin dhe Krimin e Organizuar i ka caktuar masën e sigurisë “Arrest në burg”, për veprat penale “Trafikimi i lëndëve narkotike” dhe “Pastrimi i produkteve të veprës penale ose veprimtarisë kriminale”, kryer në kuadër të grupit të strukturuar kriminal.” – njoftoi Policia.
Marsel alias Bujar Shega është administrator i dy kompanive “Viola Green” dhe “Wonder Green”. Kompanitë e tij, kanë fituar tendera për pastrimin e disa qyteteve dhe Shega njihet për njohje dhe lidhje të forta në politikë.
Biznesmeni akuzohet se pastronte paratë e bandës së Suel Çelës, të përfituara nga krimi, teksa nga bisedat e zbërthyera në aplikacionin “Sky Ecc” rezultonte si i përfshirë në trafikun e kokainës nga vendet e Amerikës Latine drejt Europës.
Marsel alias Bujar Shega pritet të dalë para GJKKO për verifikimin e masës “arrest me burg” të caktuar në mungesë.
