Në vijim të ciklit të bashkëbisedimeve me fermerët dhe blegtorët, këtë të mërkurë Nisma “Shqipëria Bëhet” zhvilloi një takim në fshatin Hing, Dimal. Gjatë takimit, u shpalos programi për fushën e bujqësisë dhe blegtorisë, duke pasur në fokus sfidat dhe mundësitë për zhvillimin e këtyre sektorëve.
Kreu i nismës “Shqipëria Bëhet”, avokat Adriatik Lapaj, sqaroi disa nga pikat kyçe të programit, me fokus te siguria ushqimore.
Lapaj deklaroi se subjektet që importojnë, prodhojnë apo shesin fara dhe fidanë në Shqipëri do të jenë të detyruara të lidhin një marrëveshje me shtetin shqiptar, duke mbajtur kështu përgjegjësi për cilësinë e produkteve të tyre.
Në vijim ai tha se të gjitha kompanitë që importojnë ose prodhojnë pesticide dhe plehra kimike do të detyrohen të nënshkruajnë një kontratë të posaçme me shtetin shqiptar, duke i konsideruar si subjekte të një rëndësie të veçantë kombëtare.
“Në programin tonë ne parashikojmë që çdo subjekt që importon, prodhon apo shet fara dhe fidanë në Republikën e Shqipërisë do të lidhë një marrëveshje të posaçme me shtetin shqiptar, në bazë të së cilës mban përgjegjësi për cilësinë e këtyre produkteve. Kjo do të thotë se, nëse vërtetohet që në fermën tënde ka ardhur dëm si pasojë e cilësisë së farës dhe fidanit, shteti shqiptar do të përgjigjet ndaj fermerit. Ndërkohë, shteti shqiptar këto lekë që do t’ia japë fermerit do të shkojë dhe do t’i marrë te kompania në fjalë, e cila ka marrëveshjen e tillë.
A ndodh që pesticidet dhe plehrat kimike që ju merrni nuk janë në standardet e duhura?
Unë dëgjoj shpesh që fermerët tanë prodhojnë produkte pa cilësi, i ndotin, i hedhin kimikate e me radhë. Unë nuk e besoj kurrë që një fermer që lodhet në fushat tona apo në fermat tona blegtorale të ketë dëshirë të prodhojë një produkt jocilësor. Nuk ndodh kjo.
Pse do ta bënte? Ai lodhet. Për çfarë duhet të ndodhë? Nuk ndodh me vullnetin tuaj.
Ndodh sepse nuk kanë cilësi.
Ti shkon te sallatori, i bën spërkatjen e fluturës. S’bën efekt. Detyrohesh t’i bësh të dytën.
Është kështu apo jo? Po i bën të dytën.
Në momentin që i bën të dytën, ajo është mbidozuar, sepse ti s’ke ç’të bësh, sepse ajo ose do të thahet, ose do të bëhet.
Ta lësh me një – do të thahet, ta bësh me dy – del jocilësore. Ku është faji i fermerit këtu?
Për këtë arsye, ne angazhojmë që të gjitha kompanitë që importojnë, prodhojnë apo shesin pesticide kristalizorë apo plehra kimikë n Republikën e Shqipërisë do të nënshkruajnë me shtetin shqiptar një kontratë të posaçme, e cila i trajton këto si subjekte të një rëndësie të veçantë kombëtare. Kjo është çështje e sigurisë kombëtare, sepse ndotja e produkteve tona ushqimore shkakton probleme shëndetësore dhe rrezikon popullatën tonë – nga ju të parët.
Sepse ju mund të prodhoni domate dhe kastravecë, po ju nuk prodhoni mandarina dhe portokalle.
Ju nuk prodhoni bulmet dhe mish.
Dhe siç ju, pa dëshirën tuaj, prodhoni produkte që mund të kenë probleme për shkak të kimikateve, edhe ata prodhojnë produkte të njëjta.
Ata hanë domatet tuaja, ju hani mandarinat e tyre.
Ata hanë specat tuaja, ju hani mishin e tyre.
Në këtë kuptim, ne jetojmë në një Republikë ku, pa dashje, të gjithë sëmurim njëri-tjetrin.
Çfarë ndodh? Të gjithë dëmtojmë. Për këtë arsye, kësaj do t’i jepet fund.
Në Republikën e Shqipërisë nuk do të importohen, nuk do të prodhohen dhe nuk do të shiten pesticide, plehra kimike dhe kristalizorë që janë jashtë standardeve të Direktivës së Bashkimit Evropian”, sqaroi Lapaj.
