Policia e Krujës ka goditur një grup kriminal të dyshuar për disa vjedhje në Fushë Krujë, ku janë arrestuar 3 persona, 3 të tjerë janë shpallur, ndërsa një ka qenë i arrestuar më herët.
Më konkretisht, në kuadër të operacionit të koduar “Formacioni” janë vënë në pranga shtetasit Aleksandër Bushgjokaj, 24 vjeç, Gani Lamaj, 33 vjeç dhe Kriste Bushgjokaj, 29 vjeç, të tre banues në Kamzë.
Raportohet se Aleksandër Bushgjokaj ishte i shpallur në kërkim dhe për veprat penale “Shkatërrimi i pronës” dhe “Largimi nga vendi i aksidentit”. Gjithashtu, bëhet me dije se Kriste Bushgjokaj është kap në flagrancë teksa drejtonte pa leje një automjet të marrë me qira, të cilin grupi e kishte përdorur për të kryer dhe për t’u larguar nga vendngjarjet. Automjeti u sekuestrua si provë materiale.
Ndërkohë, në kërkim janë shpallur shtetasit G. V., 22 vjeç, L. K., 33 vjeç dhe F. B. (D.), 33 vjeç, banues në Kamzë. Ndërkohë, si pjesë e këtij grupi kriminal ka qenë dhe shtetasi Admiral Rama, i arrestuar më herët nga Policia për vjedhje.
“Në kuadër të këtij operacioni u identifikuan 7 pjesëtarë të një grupi kriminal në fushën e vjedhjes, njëri prej të cilëve i arrestuar më herët, të cilët dyshohet se janë autorë të disa vjedhjeve në Fushë Krujë.
Nga hetimet e kryera, dyshohet se:
• Më datë 27.03.2025, të 7 shtetasit, në bashkëpunim me njëri-tjetrin, kanë vjedhur 16 000 lekë në një subjekt për transferta parash;
• Më datë 28.03.2025, 6 prej këtyre shtetasve kanë vjedhur 21 celularë në një dyqan.” – njofton Policia.
Autoritetet thonë se vijon puna për kapjen e shtetasve të shpallur në kërkim dhe, nën drejtimin e Prokurorisë së Tiranës, po vijojnë hetimet për dokumentimin me prova ligjore të vjedhjeve të tjera që mund të jenë kryer nga ky grup.
Materialet procedurale i janë referuar Prokurorisë, për veprime të mëtejshme.
