Një situatë skandaloze shfaqet në ambulancën e fshatit Varibob të Fierit. Mbetje spitalore kudo dhe për më tepër nuk ka kosha.
Drejtori i Qendrës Shëndetësore Cakran, Tonin Xhelaj thotë se janë marrë masat, kur mbetjet hidhen pa kujdes në kosha normalë plehrash.
Gazetari: Nuk hidhen bashkë?
Tonin Xhelaj: Jo! Nuk hidhen bashkë.
Gazetari: Nuk hidhen nëpër thasë nëpër qeska?
Tonin Xhelaj: Jo!
Gazetari: Nuk hidhen?
Tonin Xhelaj: Jo! Nuk bën vaki! Ne i kemi marrë masat.
Gazetari: Rëndësi ka, që këtu nuk hidhen nëpër thasë, nëpër qese.
Tonin Xhelaj: Jo!
Gazetari: Hajde me mua tani, të të prezantoj me katrahurën që ekziston këtu!
Pas sensibilizimit në “Stop” qendra u gjobit me 10 milionë lekë gjobë. Situata të ngjashme “Stop” ka transmetuar për Spitalin e Delvinës, Elbasanit, Qendrën e Shezës në Peqin dhe Spitalin e Traumës. Në 26 Tetor 2023, “Stop” denoncoi Qendrën Shëndetësore të Shkozës për mbetjet spitalore të hedhura në ambiente publike.
Inspektorati Shtetëror Shëndetësor, e gjobiti me 10 milionë lekë të vjetra këtë qendër. Por, sot Elda Çerepi, drejtore e Qendrës Shëndetësore Shkozë, thotë se për shkak të shlyerjes së gjobës e për faj të ish-drejtorit, qendra ka mbetur pa lekë. Ajo thotë se janë vetëm 8 milionë lekë për të mbuluar nevojat deri në fund të vitit.
“Shpenzimet vjetore ne i kemi nga 19, por mund të shkojnë deri në 20 milionë lekë të vjetra. Kryesisht janë faturat e energjisë elektrike, uji, interneti, medikamentet e urgjencës që i kemi të detyrueshme, lyerja, dizifektimi, pjesa e higjienës, kancelarike, plus që ne kemi dhe një pikë tjetër që e kemi marrë me qira. Kjo gjobë 10 milionë lekë i është faturuar Qendrës Shëndetësore, është marrë nga një përmbarues. Kryesisht nga ana financiare duhet të mbajë përgjegjësi vetë individi dhe jo institucioni. Këtu nuk penalizohet vetëm personeli, por këtu penalizohen 25 mijë banorë. Të gjithë banorët që vijnë këtu gjejnë një godinë që është e palyer, që është e padezifektuar, që nuk ka medikamentet të urgjencës. Nga kjo vlerë 19 milionë lekë të vjetra është hequr kjo dhe ngelen vetëm 8 milionë lekë të vjetra për të gjitha shpenzimet që ne kemi. Kjo vlerë jo vetëm që nuk del, por nuk e dimë se ku do i gjejmë këto lekë”, tha Çerepi./tvklan
