Një efektiv policie në Kaçanik të Kosovë i është bërë atentat mbrëmjen e të martës. Ngjarja ka ndodhur rreth orës 23:00, në hyrje të banesës së tij, në rrugën “Idriz Seferi”.
Efektivi i Policisë, Muhamet Lika, u qëllua me armë zjarri nga persona ende të paidentifikuar. Ai mbeti fillimisht i plagosur dhe u dërgua me urgjencë në spitalin e Kaçanikut, por nuk arriti dot t’u mbijetonte plagëve të marra.
Ende nuk ka të dhënë se kush mund të jetë autori, apo mbi motivet që kanë çuar në vrasjen e efektivit të Policisë. Autoritetet në Kosovë po kryejnë hetime për zbardhjen e ngjarjes.
“Më 01.04.2025, rreth orës 23:00, kemi pranuar një informacion se një person është plagosur dhe gjendet në gjendje të rëndë në hyrje të ndërtesës së tij, në rrugën ‘Idriz Seferi’ në Kaçanik. Viktima është një pjesëtar i Policisë së Kosovës Në vendngjarje, përveç njësive policore, ka dalë edhe ekipi i emergjencës së Kaçanikut, të cilët e kanë transportuar në Qendrën e Mjekësisë në Kaçanik. Si pasojë e plagëve të marra pjesëtari i Policisë ka ndërruar jetë, kjo është konstatuar nga mjekët në këtë qendër. Për të gjitha veprimet policore është njoftuar prokurori i shtetit dhe IPK. Hetuesit dhe krimteknikët rajonal kanë dalë në vendin e ngjarjes për t’i kryer ekzaminimet e nevojshme. Nuk dihen akoma shkaqet se si ka ardhur deri te kjo ngjarje”, – deklaroi për mediat në Kosovë, zëdhënësi i Policisë për rajonin e Ferizajt, Kanun Veseli
