Nga Basir Çollaku
Ndërsa në Gjermani i dërguari për çështjet e drogës, Burkhard Blienert, mbron ligjin e kanabisit, ai njëkohësisht paralajmëron për rritjen e rrezikshme të drogave sintetike si Tilidina, Fentanili dhe kokaina. Realiteti tregon se të rinjtë po përdorin gjithnjë e më shumë substanca më të forta dhe më të rrezikshme. Kjo është një alarm për çdo shtet.
Por ndërkohë që Gjermania ka një sistem drejtësie funksional dhe përpiqet të kontrollojë përdorimin e drogave, Shqipëria po ndjek një rrugë krejtësisht tjetër. Aty vazhdimisht diskutohet për legalizimin e kanabisit, në një vend ku krimi i organizuar dhe politika shpesh ecin dorë për dore. Pa një sistem drejtësie të sigurt dhe të pavarur, ky legalizim nuk do të sjellë një treg të kontrolluar, por do t’i japë mafies dhe trafikantëve më shumë fuqi.
Nga vend transit në konsumator droge
Shqipëria ka qenë për një kohë të gjatë një vend transit për drogat. Por tani, jo vetëm trafiku, por edhe konsumi i drogave është rritur në nivele alarmante. Heroina, kokaina dhe drogat sintetike kanë pushtuar vendin – dhe bashkë me to, janë shtuar rastet e përdhunimeve, dhunës në familje dhe shkatërrimit të strukturave sociale.
Por problemi nuk mbaron këtu: Ndërsa bosët e drogës qëndrojnë në prapaskenë, në Europën Perëndimore, Angli dhe Emirate po rekrutohen gjithnjë e më shumë shqiptarë si shpërndarës të vegjël të drogës. Të rinjtë, kryesisht nga zonat rurale, fillimisht furnizohen me sasi të vogla droge për t’i bërë të varur dhe më pas dërgohen jashtë vendit me premtime për fitime të shpejta nga 1000 deri në 1500 euro në muaj për të shitur drogë.
Ajo që nuk e dinë këta të rinj është se po vënë në rrezik jetën dhe lirinë e tyre. Në momentin që arrestohen, janë ata që përfundojnë në burg – jo bosët e drogës, të cilët janë vendosur në Shqipëri ose në Dubai. Nuk ka asnjë grup tjetër kriminal që punon aq fort në trafikun e drogës sa këta të rinj shqiptarë, të cilët shpesh nuk shohin rrugëdalje tjetër.
Shqipëria nuk mund të krahasohet me Gjermaninë
Gjermania po përballet me pasojat e legalizimit të kanabisit dhe vetë autoritetet paralajmërojnë për rritjen e numrit të të rinjve të varur nga droga. Nëse edhe një vend me drejtësi funksionale e ka të vështirë të kontrollojë këtë fenomen, si mund të mendojë Shqipëria se do ta menaxhojë?
E vërteta është e qartë: Legalizimi i kanabisit në Shqipëri nuk do të ndihmojë qytetarët – do të fuqizojë më shumë kartelet e drogës dhe do të shkatërrojë të rinjtë. Për sa kohë që drejtësia nuk është e pavarur dhe politika nuk çlirohet nga ndikimi i krimit të organizuar, nuk duhet të ketë asnjë legalizim.
Shqipërisë nuk i duhen më shumë droga, por më shumë mundësi për të rinjtë. Droga nuk është lojë, dhe Shqipëria nuk duhet të zhytet edhe më thellë në këtë humnerë…
Media gjermane..
