Organizata “Qëndresa Qytetare”, me anë të një postimi në “Facebook” shprehet se ndërkohë që qytetarëve u premtohet pasaporta evropiane, siguria ushqimore në Shqipëri është lënë në mëshirë të standardeve afrikane.
“Me bekimin e AKU-së dhe strukturave shtetërore, 18.3 ton mish pule i importuar nga Brazili, i infektuar me salmonelë, është hedhur në treg dhe konsumuar nga qytetarët shqiptarë gjatë dy javëve të fundit.
Ky është një skandal i paprecedentë, që dëshmon se siguria ushqimore në këtë vend nuk mbështetet në ligj, por në etjen për përfitim të disa firmave private dhe në korrupsionin e strukturave shtetërore. Mishi është shpërndarë në treg që nga 11 marsi, pa pritur përgjigjen e analizave laboratorike, të cilat konfirmuan më vonë praninë e bakterit të rrezikshëm Salmonela”- shkruan organizata “Qëndresa Qytetare”.
Organizata thekson se ndërsa qytetarët helmohen:
* Drejtori i AKU bën fushatë në Elbasan.
* Ministrja e Bujqësisë promovon mandarina me pesticide në Vlorë.
“Këta e kanë mendjen te fushata, jo te detyra. Ne i paguajmë të na mbrojnë, ata na ekspozojnë ndaj rrezikut.
Sipas të dhënave, rreth 7 ton fileto pule të infektuara janë konsumuar tashmë nga qytetarët. Ndërsa pritej një alarm shtetëror, autoritetet heshtën. Jetojmë në zemër të Europës, por nuk dimë më çfarë hamë:
* Peshk me parazitë,
* Akullore me lëndë kancerogjene,
* Çokollata me copa metali.
Ne nuk kërkojmë kapituj negociatash, kërkojmë dollapë ushqimi të sigurt!
Kjo nuk është pasaportë për Europën, por pasaportë helmimi, mashtrimi dhe sëmundjeje”- shkruhet më tej.
Organizata “Qëndresa Qytetare” kërkon:
* Hetim i plotë nga SPAK për këtë çështje, jo me tre punonjës që pastrojnë rrugët “në shërbim prove”, por nga koka jo nga zyrtaret ne fund te hierarkise.
* Hetim penal për të gjitha hallkat e përfshira: Autoritetet portuale, AKU, Ministria e Bujqësisë dhe çdo individ përgjegjës.
* Shkrirje e menjëhershme e AKU-së, si institucion që ka dështuar në mbrojtjen e konsumatorit.
* Krijimi i një Agjencie të re të Konsumatorit, të pavarur, te papolitizuar, të përgjegjshme dhe transparente.
Organizata thekson se shëndeti i qytetarëve nuk është çështje statistike, por jetike. Përgjegjësit duhet të japin llogari.
