Britania dhe Franca do të dërgojnë një delegacion ushtarak në Ukrainë për të punuar me forcat e armatosura të Kievit në mënyrë që t’i ndihmojnë ata të planifikojnë hapat e së ardhmes. Lajmi u bë i ditur nga presidenti francez, Emmanuel Macron në deklaratat që bëri pas përfundimit të Samitit të Ukrainës.
Samiti në Paris për Ukrainën zgjati tre orë, ndërsa i pranishëm ishte edhe presidenti Volodymyr Zelensky. Synim i samitit ishte formulimi për garancitë e sigurisë për Kievin, duke përfshirë vendosjen e mundshme të forcave ushtarake evropiane në kontekstin e një marrëveshjeje tjetër hipotetike të paqes në të ardhmen.
Kjo vjen pasi Moska paralajmëroi se Britania e Madhe dhe Franca po rrezikojnë një përplasje të drejtpërdrejtë midis Rusisë dhe NATO-s.
Presidenti Macron njofton se një “forcë sigurie” në Ukrainë do të veprojë si një garanci sigurie dhe do të vendoset një ditë pas një marrëveshjeje paqeje. Termi është i ndryshëm nga forca “paqeruajtëse” që është diskutuar deri tani.
Udhëheqësi francez shprehet më tej se disa shtete do të kontribuojnë në forcën, por ajo nuk do të jetë në vijën e kontaktit, përkundrazi do të vendoset në “zona strategjike”.
“Ne do të kemi diskutime midis udhëheqësve tanë ushtarakë për të përcaktuar vendndodhjet, numrin e forcave që do të vendosen për ta bërë atë të besueshëm dhe aftësitë që do të ketë. Asgjë nuk është përjashtuar, forcat detare, forcat tokësore dhe forcat ajrore… kjo forcë sigurie nuk duhet të zëvendësojë forcat paqeruajtëse në vijën e kontaktit ose ushtrinë e fortë dhe të fuqishme ukrainase”, tha presidenti francez.
Macron gjithashtu vuri në dukje se në takimin e sotëm “ranë dakord unanimisht” se tani nuk është koha për të hequr sanksionet kundër Rusisë.
“Nuk mund të ketë heqje të sanksioneve përpara se të vendoset paqja. Koalicioni i vullnetit synon të mbajë presionin ekonomik mbi flotën hije [ruse] dhe disa nga aftësitë e saj industriale, dhe ne do të mbesim të mobilizuar për këtë çështje”, deklaroi ai.
Presidenti francez tha gjithashtu se u vendos që të udhëzohen ministrat e jashtëm të koalicionit që të paraqesin brenda tre javësh propozime se si mund të monitorohet armëpushimi.
