Kolegji i Posaçëm të Apelimit, KPA shpalli mbrëmjen e të mërkurës vendimin për lënien në fuqi të shkarkimit nga detyra të prokurorit të Durrësit, Arben Sharra. Vendimi u mor më 26 mars në mënyrë unanime nga trupi gjykues i Kolegjit i kryesuar nga Albana Shtylla, me relatore Natasha Mulajn dhe anëtarë Mimoza Tasi, Razarta Schuetz e Sokol Çomo anëtarë, pas shqyrtimit në dhomë këshillimi të ankimit të Sharrës.
Prokurori i Durrësit, Arben Sharra u shkarkua nga detyra më 30 qershor 2022, pasi Komisioni i Pavarur i Kualifikimit, KPK konkludoi se ai kishte cënuar besimin e publikut tek drejtësia me veprimet e tij, për dyshimet e ngritura për fshehje të disa pasurive si dhe pamundësinë financiare për krijimin e tyre – konkluzione që u kundërshtuan nga subjekti. Ndërkohë, Sharra u vlerësua pozitivisht për pastërtinë e figurës dhe nuk u gjetën problem penalizuese në aspektin profesional.
Arben Sharra e filloi karrierën në sistemin e drejtësisë në vitin 1996 si oficer i Policisë Gjyqësore. Ai u emërua prokuror në vitin 2004 dhe fillimisht e ushtroi funksionin në Prokurorinë e Tiranës. Në vijim Sharra u transferua për në Dibër, ndërsa prej vitit 2010 dhe deri në shkarkimin e tij nga detyra, punoi në Prokurorinë e Rrethit Gjyqësor Durrës.
