Kohët e fundit në vendin tonë është rritur shqetësimi në lidhje me sigurinë e produkteve ushqimore që konsumojnë shqiptarët.
Ekspertja Ana Vuksani ka kritikuar ashpër Autoritetin Kombëtar të Ushqimit për dështimin në garantimin e produkteve të sigurta për konsumatorët.
Duke iu referuar rastit të mandarinave të ndaluara në Berat për shkak të mbetjeve të pesticideve, Vuksani thekson se institucionet nuk kanë arritur të sigurojnë asgjësimin e produktit, duke lënë hapësirë për dyshime të arsyeshme se ai mund të jetë hedhur në treg.
Sipas saj, sistemi i njoftimit të shpejtë RASFF siguron transparencë mbi produktet e rrezikshme, por vonesa e autoriteteve për të ndërhyrë ka ekspozuar konsumatorët ndaj një rreziku serioz për shëndetin.
“Ne kemi informacion vetëm për njoftimet e sistemit RASFF, që për konsumatorin është sistemi i një njoftimi të shpejtë pikërisht për të minimizuar riskun e një produkti që shfaq rrezik për shëndetin e njeriut. Pra, për të parandaluar hedhjen e këtij produkti në treg. Fare mirë, mund të futesh në faqen e RASFF dhe të shikosh se cilat janë ngarkesat dhe nga është origjina e tyre.
Ishte shtypi për mandarinat në dhjetor, sepse kjo është ‘gepi’ i madh, dhe ministria u kujtua vetëm pas 20 ditësh për të dalë dhe për të njoftuar publikun për riskun potencial që kishte nga mbetja e pesticideve. Dhe në fakt, për hir të vërtetës, në atë kohë na u tha: Rrini të qetë, produkti është asgjësuar.
Që në fakt nuk rezultoi kështu. Produkti nuk u gjet në treg, por ne kemi gjithë dyshimin e arsyeshëm të mendojmë që është hedhur në treg, sepse deklarata e prokurorisë mbi këtë çështje tha: 10 ton i produktit mandarinë i cili është pretenduar nga fermeri se është asgjësuar në kanalet rreth zonës edhe në landfildin e Beratit, nuk u gjet asnjë gjurmë.
Institucioni nuk ka gjetur asnjë gjurmë. Dhe ajo që unë dua të them në këtë rast është, pikërisht dështimi i autoritetit kompetent që paguhet me taksat tona për të garantuar të drejtën më themelore, ‘ushqim të sigurt’. Në këtë rast, Autoriteti Kombëtar i Ushqimit, sepse, ne duhet ta dimë që të gjitha ngarkesat që kthehen nga një vend i Bashkimit Evropian, kanë një dokumentacion, kanë një vulë që thotë kthim në kufi. Dhe kontaktin e parë me këtë ngarkesë e merr inspektori i AKU-së në detyrë inspektim në pikat kufitare. Dhe me të marrë këtë njoftim, vihet në dijeni drejtoria e Autoritetit Kombëtar i Ushqimit, që njofton drejtorinë rajonale kujt i përket biznesi dhe ngarkesa dhe menjëherë duhet të bllokohet për t’u asgjësuar. Gjë që nuk është bërë”, tha Vuksani në Syri TV.
