Kolegji i Posaçëm i Apelimit (KPA) ka rikthyer në detyrë gjyqtaren e Shkodrës, Ermira Dedja, e cila ishte shkarkuar më parë nga shkalla e parë e vetingut (KPK).
Vendimi është marrë këtë të martë në mënyrë unanime nga trupi gjykues i KPA-së i kryesuar nga Sokol Çomo, me relatore Rezarta Schuetz dhe anëtare Albana Shtylla, Ina Rama e Natasha Mulaj, pas shqyrtimit në dhomë këshillimi të ankimit të Dedjas.
Gjyqtarja Ermira Dedja ishte shkarkuar nga Komisioni i Pavarur i Kualifikimit më 12 Janar të vitit 2022 pas problemeve në kriterin e pasurisë, ndërkohë që ishte vlerësuar pozitivisht për pastërtinë e figurës dhe e aftë profesionalisht.
Shpjegimet e gjyqtares Dedja se të ardhurat nga aktiviteti i bashkëshortit, të deklaruara më parë dhe të provuara me dokumentacion ligjor, kishin shërbyer si burim për pagesat e kësteve të një apartamenti nuk ishin vlerësuar bindëse nga KPK-ja, pasi nuk ishin pasqyruar si gjendje cash në vitet përkatëse dhe as si burim i krijimit të pasurive në deklaratat periodike dhe në atë “veting”.
Gjithsesi, argumentet e përdorura nga gjyqtarja duket se kanl bindur trupën e KPA-së, dhe vendimmarrja e Kolegjit të Posaçëm të Apelimit për ndryshimin e vendimit të KPK-së, është përfundimtare.
Ermira Dedja e ka filluar karrierën në sistemin e drejtësisë në vitin 1993 dhe punon prej gati tre dekadash si gjyqtare në Gjykatën e Shkodrës.
