Një prej proceseve gjyqësore më të mëdha në historinë e Maqedonisë së Veriut po merr formë, ndërsa rreth 300 dëshmitarë pritet të dalin para drejtësisë për të dhënë dëshmi mbi tragjedinë e diskotekës “Pulse” në Koçan. Ky incident tragjik, që mori jetën e 59 personave dhe la të plagosur rreth 200 të tjerë, ka çuar në hetime të gjera, ku janë përfshirë 34 individë dhe tre subjekte juridike.
Sipas Prokurorisë Themelore Publike, një ekip prej 11 prokurorësh po vazhdon mbledhjen e provave, ndërsa ende nuk është përcaktuar qartë se deri ku do të shtrihet përgjegjësia. Prokurori publik Lupço Kocevski ka kërkuar një hetim të plotë, duke theksuar rëndësinë e shqyrtimit të çdo aspekti të përgjegjësisë për këtë ngjarje të rëndë.
Përgjegjësia institucionale dhe politike
Hetimet kanë zbuluar se diskoteka “Pulse” ka operuar që nga viti 2012 deri në mëngjesin tragjik të 16 marsit 2025, megjithëse nuk i ka përmbushur kushtet për sigurinë publike. Tre kryetarë të Komunës së Koçanit që kanë shërbyer gjatë kësaj periudhe janë vendosur nën hetim, pasi kanë lejuar funksionimin e lokalit pa kushtet e nevojshme ligjore.
Megjithatë, Prokuroria deri tani ka përfshirë në hetim vetëm zyrtarët që kanë qenë në poste gjatë viteve 2021-2023, periudhë kur lokali mori licenca të reja, për të cilat dyshohet se janë siguruar përmes ryshfetit. Në këtë kuadër, nën hetim është vënë ministri i Ekonomisë Kreshnik Bekteshi, bashkë me sekretarin shtetëror dhe tre zyrtarë të tjerë të Ministrisë.
Gjithashtu, ish-drejtori i Drejtorisë për Mbrojtje dhe Shpëtim, Bekim Maksuti, po hetohet për rolin e tij në dhënien e lejeve, ndërsa nuk është ende e qartë nëse hetimi do të zgjerohet ndaj drejtorëve të mëparshëm që kanë lejuar funksionimin e kabaresë pa licencë.
Mungesa e kontrolleve dhe dyshimet për manipulime
Përgjegjësia është shtrirë edhe tek Inspektorati i Tregut, ku nga nëntë drejtorë që kanë mbajtur postin gjatë viteve të operimit të “Pulse”, aktualisht vetëm njëri prej tyre, Goran Trajkovski, dhe tre inspektorë janë vënë nën hetim për mospërmbushje të detyrave të tyre.
Ndërkohë, shtatë zyrtarë të lartë policorë nga rajoni i Shtipit dhe Koçanit janë vendosur nën hetim për dhënien e miratimeve të dyshimta për funksionimin e diskotekës. Megjithatë, hetimet ende nuk janë zgjeruar ndaj ish-ministrave të Punëve të Brendshme që kanë drejtuar institucionin gjatë kësaj periudhe.
Pyetje të hapura dhe hetime të mëtejshme
Në mesin e akuzave të ngritura, është ngritur çështja e rolit të Drejtorisë për të Ardhurat Publike (DAP), e cila, pavarësisht se kishte konstatuar shkelje të mëdha në fund të vitit 2024, nuk arriti të ndalonte operimin e lokalit. Edhe pse diskoteka ishte mbyllur për shkak të mungesës së faturave fiskale, ajo vazhdoi të operojë pa e paguar gjobën.
Për momentin, nuk ka ende akuza të drejtpërdrejta për zyrtarët e DAP-it, as për ish-ministrat e Punëve të Brendshme dhe të Ekonomisë që kanë mbikëqyrur funksionimin e diskotekës ndër vite. Hetimet po vazhdojnë dhe pritet të përcaktojnë nëse do të ketë zgjerim të përgjegjësisë në nivele të tjera të pushtetit.
Gjyqi për tragjedinë e Koçanit pritet të jetë një nga proceset më të ndërlikuara dhe të debatueshme në Maqedoninë e Veriut, ndërsa familjarët e viktimave dhe publiku kërkojnë drejtësi dhe përgjegjësi të plotë për këtë katastrofë të paralajmëruar.
