Jo vetëm fshatrat, por shpopullimit nuk i shpëtojnë as qytetet e mëdha të vendit. Një nga indikatorët matës të popullsisë, lindshmëria, tregon të dhëna se në Vlorë e ardhmja e popullsisë është e zymtë.
Sipas mjekes gjinekologe, Sofika Xhelilaj, gjatë muajit janar, shkurt dhe deri në datën 20 mars, të vitit 2025, në maternitetin e Vlorës kanë lindur vetëm 65 foshnja.
Mjekja tregon se shkak kryesor i uljes së lindshmërisë është pasiguria ekonomike e çifteve të reja, por nuk mbeten mbrapa as faktorë të tjerë.
“Kjo është një tregues që ne kemi një rënie të lindjeve. Psh të moshës mbi 33 vjeç është një faktor ku ne instistojmë për të stimuluar një lindje nëse është në plan. Infeksionet seksualisht të transmetueshme, problemet me kistet dhe tumoret. Shkak kryesor për uljen e lindshmërisë është faktorët ekonomikë, sociale dhe shoqërore. Shumica e të rinjve janë larguar, shumica bëjnë martesë të madhe”, tha mjekja për Syri tv.
Sipas të dhënave për vitin 2024, në vend kanë lindur vetëm 22,425 foshnja, duke regjistruar një rënie prej 5% krahasuar me vitin 2023, shifra më e ulët e lindjeve që nga viti 1934.
