Në redaksinë e emisionit “Stop” janë drejtuar 22 shoferë të Urgjencës në Spitalin e Durrësit, që thonë, se nga Gushti 2024 atyre u është ulur paga me 16 mijë lekë të reja rroga. Punonjësit thonë, se punojnë 12 orë dhe paguhen për 8.
“Problematika jonë është nga Gushti i 2024 e deri në këtë muaj që jemi. Paga ka ndryshuar rreth 16 mijë lekë të reja më pak.”
“Gjithandej me vendim të qeverisë u rritën rrogat edhe tek ne shoferët erdhi vendimi që të rriteshin rrogat u rrit një muaj, muajin tjetër na u ul me 200 e ca mijë lekë të vjetra. Arsyen nuk e dimë.”
“Punojmë 12 orë në ditë, paguhemi për 8.”
“Po kështu ditët e festave, apo të shtunat e të dielat, nuk paguhen. Ata i janë drejtuar me shkresa Drejtorisë së Spitalit, por nuk kanë marrë zgjidhje”.
“E shtuna dhe e diela nuk njihen fare. Vetëm 40 orë në javë.”
“Ditët e shtuna dhe e diela duhet të na paguhen për aq kohë sa është nga Këshilli i Ministrave.”
“Ekziston një vendim bordi, që ne kemi punuar kaq vite dhe vendimi i bordit përcakton që ne duhet të punojmë 12 orë dhe të paguhemi 12 orë. Për këtë gjë ne duam që të shqyrtohet dhe të merren masa. Ne duam që të paguhemi për aq sa punojmë.”
“Mjeku dhe infermier paguhen për 12 orë, kurse ne jo.”
“Ne jemi një ekip që duhet të paguhemi të gjithë 12 orë, ne kemi 7 muaj që punojmë 12 orë dhe paguhemi 8 orë.”
“I kemi vërë një kërkesë Drejtorisë së Spitalit, por nuk kemi marrë asnjë përgjigje nga kjo kërkesë.”
Shefi i Urgjencës, Gjergj Qerimi shpjegon se sipas një auditi kanë rezultuar shkelje me pagesat e shoferëve.
“Jam vënë në dijeni nga shoferët. Nuk është detyra ime që të përcaktor pagën e shoferëve, infermierëve, qoftë edhe mjekësve. Padyshim që unë jam interesuar, më kanë kthyer një përgjigje dhe më kanë thënë që sipas kontrollit që ka ardhur nga fondi dhe nga Ministria e Shëndetësisë është vënë re që pagesat që kanë marrë më përpara stafi i shoferëve nuk kanë qenë të sakta, pra u është dhënë më shumë seç duhet”, tha shefi i Urgjencës, Gjergj Qerimi.
Gazetarja bashkë me 22 denoncuesit i drejtohen administratës sëspitalit dhe shefja e zyrës së financës Eneda Shyti thotë që do t’i bëjë shkresë Ministrisë që ky rast të shqyrtohet.
“Në Korrik, është vendimi 112 datë 22.02.2006 që thotë se duhet të bazohen në Kodin e Punës. Është një problematikë që ka ardhur edhe në vazhdimësi të kontrolleve që kanë ardhur. Ne jemi duke u adituar momentalisht. Mesa di unë është problematike pjesa e shoferëve. Na vijnë nga ministria me VKM, të përcaktuara dhe ne zbatojmë VKM-të. Duhet bërë profili që duhet rregulluar ky profili i 12 orë dhe 8 orë”, tha shefja e Zyrës së Financës, Eneda Shyti.
Nëndrejtoresha e spitalit, Klementina Meçi, shpjegon se pret konkluzionet e auditit, për të reflektuar mbi këtë problematikë e për të zgjidhur problemin e 22 shoferëve të Urgjencës.
“Në bazë të vendimit 422, 26.06.2024, është institucioni përkatës i njësisë vendore që përcakton shkallën e vështirësisë. Ne u jemi drejtuar atij me shkresë zyrtare për të pritur një përgjigje. Duhet t’u themi që jemi në një proces, sepse në bazë të auditit të Ministrisë të Shëndetësisë ngritur në Dhjetor të 2024-ës kanë marrë në shqyrtim gjithë këto pretendime dhe janë në fazën që do të sjellin rekomandimet përkatëse. Deri në momentin që vjen vendimi i formës së prerë nga ana e Ministrisë së Shëndetësisë ne nuk ndërmarrim asnjë hap. Është vënë në dijeni, ka audituar, ka dalë në konkluzione dhe ne vetëm presim konkluzionet që t’i vëmë në zbatim direkt. Do marrim vendimin, jemi duke e shqyrtuar dhe patjetër që do reflektojmë. Presim të gjitha institucionet që të marrin një vendim të ligjshëm”, nëndrejtoresha e spitalit, Klementina Meçi./tvklan
