Erion Veliaj ka firmosur nga qelia shkarkimin e kryetares së komanduar të Bashkisë së Tiranës, Anuela Ristanin, rreth një muaj pas delegimit të detyrës së saj. Ky veprim ka çuar në një përplasje mes Veliajt dhe kryeministrit Edi Rama.
Avokati Jordan Daci, i ftuar në emisionin “Të Paeksponuarit” në MCN TV, ka sqaruar arsyet pse, edhe pas këtij zhvillimi, Veliaj nuk mund të shkarkohet nga detyra.
Ai theksoi se shkarkimi i Veliajt nuk mund të bëhet pa një vendim fajësie të gjykatës, thjesht për një masë sigurie.
“Zoti Veliaj nuk mund të shkarkohet as pas 90 ditësh. Duke marrë parasysh standardet e vendosura në rastin e z. Zef Hila dhe unë kam qenë përfaqësues në Gjykatën Kushtetuese dhe, nëse do të bëhej një shkarkim i Veliajt, kjo do të nënkuptonte një seancë gjyqësore publike, ku ai mund të mbrohej me avokatë.
Kjo do ta shndërronte këtë çështje në një betejë ligjore mes Bashkisë së Tiranës dhe Këshillit të Ministrave, gjë që nuk mendoj se intereson as qeverisë dhe as Veliajt.
Nga ana tjetër shkarkimi i Veliajt nuk mund të bëhet pa një vendim fajësie të gjykatës, thjesht për një masë sigurie. Sot për sot nuk ka një shkak ligjor që mund të legjitimonte shkarkimin e tij. Kryeministri mund ta bëjë shkarkimin, pa respektuar procedurën, pr vetëm nëse Gjykata Kushtetuese do të pranonte atë që ka vendosur vetë, do ta gjente atë jokushtetues.
Ndërsa sa i përket mungesës për tre muaj, ligji thotë, se mund të propozohet shkarkimi, nga këshilli bashkiak, por ka një problem përsëri, si edhe në rastin e zotit Berisha, mungesa nuk është për faj apo për mungesë dëshire të zotit Veliaj, por për një shkak të pakontrollueshëm prej tij, pra mungesë e arsyetuar. Pra është mungesë me arsye. As Këshilli nuk mund të bëjë kërkesë për shkarkim”- tha avokati Daci.
