Presidentja e Kosovës Vjosa Osmani deklaroi se draft-statuti i Asociacionit të komunave me shumicë serbe, i propozuar nga Bashkimi Europian, nuk do të merrte miratimin e Gjykatës Kushtetuese nëse do të shkonte për vlerësim. Këto deklarata i bëri gjatë një konference për media së bashku me homologun e saj nga Letonia, Edgars Rinkevics, i cili qëndroi gjatë së enjtes në Prishtinë për vizitë zyrtare.
“Personalisht besoj se nuk janë në përputhje me Kushtetutën e Kosovës, po ashtu nuk janë në përputhje as me normat dhe standardet e Bashkimi Evropiane e vlerat e Këshillit të Evropës. Po ashtu nuk janë në përputhje me vendimin e Gjykatës Kushtetuese të vitit 2015 dhe një draft-statut i tillë që bie ndesh në këto të tria s’ka sesi të hyjë në fuqi dhe nuk besoj se do të kalonte çfarëdo testi në Gjykatën Kushtetuese”.
Osmani shpreson që me ardhjen e emisarit të ri të Bashkimit Europian për dialogun, Peter Sorensen, do të rikthehen ekuilibrat në këtë proces. Optimist për rolin e Sorensen dhe të shefes së re të BE-së për politike të jashtme, Kaja Kallas u shpreh edhe kreu i Letonisë që nxiti Kosovën e Serbinë të vazhdojnë bisedimet.
“Në këtë pikë ku jemi dialogu duhet të vazhdojë. Kemi përfaqësuesin e ri të lartë dhe diskutuam vizitën e emisarit për dialog. Nëse krijohen parakushte të mira për vazhdimin e dialogut në bazë të barazisë dhe parimeve kyçe që të gjitha vendet që duan të bëhen pjesë e BE-së i ndajnë me njëra tjetrën atëherë ky dialog do të jap rezultate të prekshme”, u shpreh presidenti letonez.
Osmani gjithashtu i kërkoi Bashkimit Europian që të jap një përgjigje të qartë Serbisë, që sipas saj, përpiqet në vazhdimësi të tensionojë situatën dhe të rikthejë rajonin nga e kaluara dhe konfliktet.
“Kosova ka bërë çmos që të kontribuoj në stabilitetin rajonal, përkundër faktit se dyviteve të fundit kemi pasur sulme të agresionit nga Serbia në veri të vendit tonë me synimin e qartë që të aneksohet territori ynë sipas modelit rus të aneksimit”.
Kosova kërkon që t’i hiqen edhe masat ndëshkuese të Bashkimit Europian, për të cilat u pajtua edhe presidenti letonez.
“Qëndrimi i vendit tim është që Bashkimi Evropian duhet t’i heqë masat kufizuese. Qëndrimi i Letonisë është shumë i qartë. Mendojmë se duhet të largohen masat ndëshkuese dhe për këtë avokojmë në Bashkimin Evropian dhe të do të vazhdojmë të bëjmë këtë. Bindja ime është sesa më shpejt që do të ndodh kjo aq më mirë do të jetë”.
Në lidhje me dhënien e statusit të vendit kandidat për Kosovën, Rinkevics tha se kjo është një vendimmarrje e përbashkët e vendeve anëtare të Bashkimit Europian, por se Letonia mbështet Kosovën në rrugën e saj drejt anëtarësimit në strukturat euroatlantike.
