Skënder Arapi është drejtuar në redaksinë e emisionit “Stop” për një ankesë, që lidhet me një çështje gjyqësore të gruas së tij Fahrije Xhahysa, për pronësi.
Për këtë çështje janë ndjekur të gjitha shkallët e gjyqësorit deri në Gjykatën e Lartë, e cila nuk ka pranuar rekursin. Në muajin Prill 2024 Skënderi thotë se kanë pajtuar një avokat, për të ndjekur çështjen në Gjykatën Kushtetuese. Avokatin Naim Gjuta e paguan 500 mijë lekë të vjetra. Pritën një vit dhe morën vesh se nuk ka asnjë çështje të tyren në Gjykatën Kushtetuese.
“Unë jam bashkëshorti i Fahrije Xhahysës e cila ka pronën dhe e kam ndjekur tek të gjitha shkallët e gjyqësorit. Si përfundim kaluan në Gjykatën e Lartë dhe Gjykata e Lartë u mor vendimi i formës së prerë. Pastaj shkuam tek një avokat Naim Gjuta, ku dhe komunikuam me atë dhe i thamë që do e kalojmë në Gjykatën Kushtetuese, ai ra dakord. I dhamë prokurën, i dhamë dhe 500 mijë lekë të vjetra. Kjo ndodhi në Prill të vitit 2024. Duke e pyetur vazhdimisht avokatin, duke i thëne që a ka mbaruar çështja, a ka shkuar çështja në Gjykatë Kushtetuese ai më tha që ka shumë radhë. Unë u interesova vetë në Gjykatën Kushtetuese, ku në të vërtet në gjykatë nuk është disponuar asnjë dosje në emër të Fahrije Xhahysës. Avokati nuk e ka çuar çështjen në Gjykatën Kushtetuese, për këtë mund të japë llogari vetë ai”, tha për mikrofonin e emisionit “Stop” denoncuesi.
Në bisedën me avokatin, ky i fundit thotë se po pret të marrë vendimin e Gjykatës së Apelit. Ai nuk e di fare, se çfarë ka ndodhur dhe Gjykata Kushtetuese ka afat 45 ditë deri në 6 muaj në rast provash të reja, për ta çuar çështjen.
Avokati: Kam bërë një kërkesë në Hipotekë unë. Në hipotekën e përgjithshme online, për të marrë pjesë, për të përcaktuar, se çfarë tokash disponon Fahrija dhe ato. A janë të regjistruara në emër të Fahrijes ndonjë pronë dhe sa është sipërfaqja e regjistruar e pronës. Gjykata e Apelit të Durrësit, nuk ma kanë kthyer, nuk e kam marrë vendimin origjinal, por duhet me shku, me e marr te Gjykata e Apelit në Tiranë, tani që ka ardhur. Ka ardhur arkiva këtu dhe duhet ta marr dhe të kërkoj edhe njëherë rishikim të vendimit. Fahrijes i kam detyrim dhe do t’ia bëj. Atë, që i kam thënë, do t’ia bëj, se s’bën.
Ndërkohë nga vendimi i Gjykatës së Lartë ka kaluar një vit dhe në këtë mënyrë avokati ka penalizuar klienten e tij, për ankimim.
“Stop” shkoi të takojmë avokatin Naim Gjuta, i cili sillet me harbutëri dhe e mëson vetëm prej nesh vendimin e Gjykatës së Lartë.
Gazetarja: Për çfarë e keni marrë këtë çështjen e zonjës Fahrije Xhahysa.
Avokati: Nuk e kam marrë për Gjykatën Kushtetuese, e kam marrë për të rishikuar vendimin dhe s’më ka sjellë akoma provat e veta.
Gazetarja: Sa kohë u bë?
Avokati: 6 muaj, ja 1 vit gati.
Gazetarja: Dhe çfarë ka ndodhur me çështjen?
Avokati: Nuk m’i ka sjellë dokumentet.
Gazetarja: Ia keni kërkuar ju?
Avokati: Ia kam kërkuar unë atij burrit të vet. Tani a ka mundësi të lutem. E kuptoni ju se po merrni në qafë kot njerëzit! Dilni përjashta!/tvklan
