Ju deshën më shumë se dy mandate që vetëm të çelte negociatat për integrimin në BE, kjo edhe falë ndihmës së Putin, ashtu siç e ka deklaruar ai, por tashmë, Edi Rama pretendon se do ta futë Shqipërinë në Union brenda një mandati, madje që në vitin 2027.
Teksa zgjedhjet e kaluar dilte me timon dhe tepsi në dorë, Rama këtë fushatë ka zgjedhur të mbajë pasaportën shqiptare në dorë, ku pretendon se do t’i shtojë dhe mbishkrimin “Bashkimi Europian” sipër.
Gjatë rubrikës “Sy më Sy” në rrjetet sociale, Rama shkon deri aty sa deklaron se nëse nuk i japin shqiptarët këtë mandat për ta futur Shqipërinë në BE, sipas tij, shqiptarët do të presin me vite të tëra për ta realizuar.
Kjo është thjesht propagandë dhe mashtrim në prag të zgjedhjeve, se pastaj si gjithmonë do dalë dhe do thotë se fajin e ka BE me problemet e saj të brendshme që nuk u futëm, pasi sipas tij, Shqipëria gjithmonë i ka të plotësuara kushtet.
“Marrja e pasaportës së BE është shumë më tepër se lëvizje e lirë. Që kur hyjmë në një kufi të BE. Pasaporta e BE na bën qytetarë të dorës së parë, sepse nuk ka më kufi për ne, nuk hyjmë më në radhë për të shkuar tek ai polici. Nuk na pyet më njeri sa do rrimë as kur futemi brenda. Mund të kërkojmë punë ku të duam.
Së pari më shumë sesa një fitore për mua personalisht që në fund të ditës, fitoret e mia po qe puna për t’i provuar vetes diçka i kam bërë dhe tejkaluar më shumë sesa një fitore për PS, partinë time që kam nderin të udhëheq, kjo është një fitore për të gjithë dhe për ty personalisht, hyrja në BE. Ti më thua mua që kohë e gjatë. E di kur i ka filluar negociatat Mali i Zi, në vitin 2012. Ne i kemi filluar vjet. E di kur i ka filluar Serbia, në 2014. E di ti se ku gjendet sot Serbia dhe ku gjendemi ne në procesin e negociatave. Ne jemi përpara. E di kur është bërë Maqedonia e Veriut kandidate për BE, në 2005. E di që RMV s’i ka hapur akoma negociatat, çfarë flisni? Si e dini ju hyrjen në BE? E di se çfarë është të negociosh me BE? Të kesh institucione të besueshme, disa standarte bazë si BE dhe ne po e bëjmë këtë do apo nuk do ti. Ne po bëjmë shtet sepse pikërisht negociatat dhe hyrja në BE janë testi dhe provimi i shtetit. Ky shtet. Janë 27 shtete anëtare, ky shteti tjetër që do të bashkohet me ne i ka parametrat që të jetë pjesë e kësaj krushqie? Kur ata të fusin brenda dhe thonë je njësoj si ne, populli yt do të vijë te ne, populli ynë do të vijë te ty dhe të gjithë duhet të ndihen të mbrojtur, si thua ti? Janë lojëra këto. Çfarë janë këto muhabete? Jo që nuk jemi të paaftë, po përkundrazi o e fus unë dhe PS Shqipërinë në BE ose kjo punë mund të mos bëhet kushedi sa vjet të tjera. Kur ne morëm detyrën nuk na hidhte njeri sytë.” – deklaroi Rama.
