Sali Berisha është paraqitur ditën e sotme në orën 10:00 në Prokurorinë e Posaçme (SPAK) për të zbatuar masën “detyrim paraqitje” të caktuar më 3 Janar nga Gjykata e Posaçme e Apelit në kuadër të dosjes “Partizani”.
Kjo është e disata herë që Berisha paraqitet në SPAK, teksa sipas vendimit të marrë nga gjyqtari i Apelit, Engert Pëllumbi, lideri demokrat duhet të paraqite para oficerit të Policisë Gjyqësore, të hënën e parë dhe të tretë të çdo muaji. Ndryshe nga herët e tjera, Berisha u prit nga një numër i vogël militantësh.
Për dosjen “Partizani”, Berisha është marrë i pandehur për akuzën e veprës penale “Korrupsion pasiv i funksionarëve të lartë shtetërore ose të zgjedhurve vendorë”, kryer në bashkëpunim.
Sipas SPAK-ut, Berisha në kohën kur ka qenë kryeministër ka vendosur në funksion të interesave të dhëndrit të tij Jamarbër Malltezi bazën ligjore, si edhe ka ushtruar presion mbi vartësit për të nxitur plotësimin sa më të shpejtë të procedurave të kthimit të pronës dhe privatizimit të godinave të degraduara të ish-klubit sportiv “Partizani”.
Pas daljes nga SPAK, Berisha lexoi para mbështetësve edhe atë se çfarë kishte shkruan në procesverbalin e sotëm, ku theksoi se amnistimi i krimit elektoral nga Dumani dhe Skapi i partisë është krimi antikushtetues dhe antidemokratik
“Amnistimi i krimit elektoral nga Dumani dhe Skapi i partisë është krimi antikushtetues dhe antidemokratik më i madh në historinë e pluralizmit politik. Është atentati më i rëndë ndaj zgjedhjeve të lira. Sali Berisha.” – tha Berisha
