Një 41-vjeçar është arrestuar nga Policia e Kufirit dhe Migracionit në Korçë, pasi akuzohet se ndihmonte kundrejt fitimit 600 deri në 800 euro shtetas të ndryshëm për të kaluar kufirin në mënyrë të paligjshme
Në kuadër të operacionit të koduar “Green Border” është vënë në pranga shtetasi B. M., banues në fshatin Tresenik, Devoll, teksa mbi të rëndon akuza për veprën penale “Ndihma për kalim të paligjshëm të kufirit”.
“Ky shtetas në bashkëpunim me shtetasin K. I që jeton në shtetin grek, dhe është arrestuar në Greqi, për të njëjtën vepër penale, kanë ndihmuar për të kaluar në mënyrë të jashtëligjshme tre shtetas, (ndërmjet tyre dhe një foshnjë 9 muajsh me mamanë e saj), nëpërmjet kufirit të gjelbër Kapshticë, për në shtetin Grek. Po nga hetimet dyshohet se ky shtetas këtë veprimtari kriminale e ka kryer dhe më parë në bashkëpunim me shtetasin e arrestuar në Greqi” – thuhet në njoftimin e Policisë.
Materialet procedurale i kaluan Prokurorisë së Korçës për veprime të mëtejshme.
