Deputetja e Partisë Demokratike, Jorida Tabaku, ka komentuar kandidimin e saj në listën e hapur të PD-së për zgjedhjet parlamentare të 11 majit 2025.
Gjatë një lidhje direkte për Euronews Albania, ajo u shpreh e bindur për mundësinë e fitimit të kësaj sfide dhe theksoi se vendimi për ta lënë në listën e hapur nuk ishte një surprizë për të, pasi e kishte diskutuar dhe po ashtu e kishte ndarë dhe me familjen duke marrë parasysh angazhimin e madh që kërkonte ky hap.
“Nuk ishte një surprizë për mua, pasi ky është një proces që është diskutuar dhe analizuar me kohë. Kam diskutuar me familjen, pasi kam tre fëmijë të vegjël, dhe e kuptoj që ky angazhim do të kërkojë një nivel tjetër të përpjekjes nga ana ime. Familja ka koston e saj dhe këtë e kam diskutuar në detaje me ta.” tha Tabaku.
Ajo theksoi se nuk ka opsione të tjera për të përveçse të qëndrojë në Partinë Demokratike dhe se nuk e mendon kurrë për të hapur një parti tjetër ose për të qenë hakmarrëse.
“Unë e kam thënë edhe më herët, se e meritoja të isha në listën e mbyllur dhe e thashë këtë në mënyrë të thjeshtë dhe të sinqertë. Por PD mendon se jam aq e fortë sa mund të fitoj në listën e hapur,” tha Tabaku.
Ajo përmendi gjithashtu se ka marrë mbështetje të madhe nga qytetarët dhe se ka qenë vazhdimisht në kontakt me ta për të kuptuar nevojat e tyre. Në lidhje me mundësinë që të kandidonte në një qark tjetër, Tabaku u shpreh se nuk do ta pranonte këtë, pasi është një tironse dhe ndihet e përgjegjshme për të përfaqësuar këtë komunitet.
“Nuk mund të shkoj askund tjetër. Jam tironse dhe përfaqësoj këtë qytet. Nuk largohem nga Tirana.” tha ajo, duke theksuar se ky angazhim ishte i pazëvendësueshëm për të.
Tabaku gjithashtu përmendi se sesioni aktual i Parlamentit është i fundit për të si deputete, pasi ditën e hënë ajo nuk do të jetë pasi ka një aktivitet tjetër.
“Kjo ishte një ditë emocionuese për mua. Fola në parlament për herë të fundit, por jam e sigurt që do të rikthehem aty pas zgjedhjeve të vitit 2025,” tha ajo. Ajo shtoi se, gjatë gjithë periudhës së saj si deputete, ka qenë shumë aktive dhe se ka dhënë kontribut të vazhdueshëm për qytetarët.
“Ajo që ndodhi sot në parlament ishte një pasqyrë e gjendjes së vështirë që po kalon Kuvendi. Salla ishte bosh, komisionet ishin bosh, por unë gjithmonë kam qenë pranë qytetarëve, dhe as sot nuk mund të mungoja.” tha Tabaku.
Në fund, Tabaku shprehu bindjen e saj se do të jetë fituese në garën për deputete të PD-së dhe se do ta çojë deri në fund këtë betejë politike, duke u angazhuar për qytetarët dhe për forcimin e PD-së në të ardhmen.
