Vota e diasporës dhe sistemi i primareve brenda Partisë Demokratike për përzgjedhjen e kandidatëve për deputetë, ka krijuar interes të lartë tek emigrantët, jo thjesht për të votuar, por edhe për të qenë aktivë në jetën politikë të vendit.
Doktor Erion Dasho, i cili jeton dhe punon prej vitesh në Gjermani, e vlerësoi këtë rast si një mundësi të mirë për të ofruar kontributin e tij professional dhe publik në jetën politike dhe parlamentare shqiptare.
Megjithatë, Dasho duket se përbën një prej atyre shembujve tipikë, ku oferta dhe dora e shtrirë drejt kapaciteteve intelektuale të emigracionit, shpesh nuk është edhe aq e sinqertë.
Doktor Dasho u përfshi në primaret e Partisë Demokratike për Qarkun e Beratit, një zonë shumë e vështirë elektorale për të djathtën. U rendit i treti në radhën e më të pëlqyerve nga anëtarët e Partisë Demokratike.
Ky rezultat ishte me të vërtetë befasues, duke pasur parasysh se ai jeton në pjesën më të madhe të kohës jashtë Shqipërisë. Por, duket qartë se elektorati opozitar i Beratit ka vlerësuar tek doktori angazhimin e tij publik dhe politik.
Prej disa vitesh, Erion Dasho ka sjellë për median dhe publikun shqiptar të vërtetat e sistemit shëndetësor në Shqipëri, duke nxjerrë zbuluar propagandën e shfrenuar të Edi Ramës dhe qeverisë së tij.
Dasho ishte zëri qetësues për mijëra e mijëra shqiptarë, të cilët, në kohën e Covid-it, krahas frikës nga sëmundja e panjohur, duhet të përballonin terrorin e shpërndarë publikisht nga Edi Rama.
Pra, profili publik i ndërtuar me qetësi dhe maturi nga doktor Erion Dasho, e shndërruan atë në një figurë të pëlqyer nga votuesit e djathtë në qarkun e Beratit.
Por, tashmë që jemi në orët e fundit të përgatitjes së listave së kandidatëve për zgjedhjet parlamentare të 11 Majit 2025, Partia Demokratike duket se ka vendosur të mos vlerësojë kontributin e tij, duke e përjashtuar nga përfshirja e emrit të doktorit në atë që konsiderohet “listë e sigurtë”.
Të dhënat e rrjedhura deri më tani, të cilat ende nuk janë formalizuar, sugjerojnë se “listat e sigurta” do të plotësohen me “njerëz të besuar” të kryetarit Sali Berisha, por që, në një pjesë të mirë, nuk kanë dhënë ose as nuk kanë më mundësi të japin impuls të rëndësishëm politik.
Kjo “kastë” po vijon të bllokojë prurje të reja cilësore. Prania e Erion Dashos në Parlament, elokuenca dhe forca e argumentit të tij, është një vlerë më e shtuar për të djathtën.
