Mesnata e sotme është afati i fundit ku partitë politike janë të detyruar të dorëzojnë emrat e kandidatëve për zgjedhjet parlamentare të “11 majit”.
Sa më shumë kalojnë orët aq më tepër shtohen “ethet” e kandidatëve për deputetë ku vëmendja më e madhe është tek dy kampet PS dhe PD të cilët do të gëzojnë edhe “tortën” më të madhe elektorale.
Pas kryeqytetit, sigurisht sytë e të gjithëve janë nga qarku i Elbasanit ku kreu i demokratëve Sali Berisha po “përpilon” një listë me emrat e sigurt që do të dalin deputetë në legjislaturën e ardhshme.
Largimi i deputetit Dashnor Sula po e kthen në një luftë akoma edhe më të madhe qarku e Elbasanit ku Berisha po rezervon surpriza me emrat.
I pari në listën e sigurt në qarkun e Elbasanit është Tomor Alizoti i cili mesa duket ka “fituar” besimin e kreut të PD-së.
Burime të “Boldnews.al” nga kampi blu bëjnë me dije se emri i dytë dhe i tretë në listën e mbyllur janë respektivisht: Aurel Bylykbashi dhe Bledi Himçi.
Burimet thonë se një tjetër kandidate në listë të sigurt po përflitet emri i një “femre misterioze” nga Elbasani.
Ndërkohë po vazhdon “lufta” brenda kampit demokrat se kush do të jetë i pesti në listën e mbyllur në qarkun e Elbasanit.
Emrat që po përfliten nga lista e mbyllur e PD në qarkun e Elbasanit: Tomor Alizoti, Aurel Bylykbashi, Bledi Himçi, (kandidate “femër misterioze” nga Elbasani).
Për vendosjen përfundimtare të listave sot në orën 17:00 mblidhet Kryesia e PD dhe në orën 19:00 mblidhet Këshilli Kombëtar.
Lista finale e kandidatëve për deputetë pritet të zyrtarizohet mesnatën e 12 marsit, kur edhe skadon afati, kur të jenë reflektuar edhe emrat e kandidatëve të partive aleate që do të futen në listë të hapur./ Boldnews.al
