Personi që shihni në foton e mësipërme është kreu i Bashkisë së Tiranës, Erion Veliaj. Gazetarët kanë arritur të kapin një pamje të tij para se të futej në fugon të Policisë, pas daljes nga seanca në Apel, për t’u transferuar në paraburgimin e Durrësit.
Ditën e sotme, Gjykata e Posaçme e Apelit shtyu vendimin ndaj Veliajt për ditën e nesërme, (e mërkurë, 12 Mars) në orën 12:30, për shkak se avokatët kanë kërkuar kohë që të njihen me provat e reja, të paraqitura në seancën e sotme nga prokurorët e çështjes, Ols Dado dhe Altin Dumani.
Burime për mediat bëjnë me dije se provat e reja të dorëzuara sot nga SPAK rëndojnë pozitat e kryebashkiakut dhe përforcojnë argumentet pse Erion Veliaj duhet të qëndrojë në masën “Arrest me burg”.
Ndërkohë, mësohet se Erion Veliaj ende nuk ka parashtruar argumentet e tij para togave të zeza. Seanca e sotme nisi në orën 10:00 dhe zgjati për rreth 7 orë, e drejtuar nga gjyqtari Engert Pëllumbi, i cili pritet të japë dhe vendimin.
Pas një hetimi 1 vjeçar të SPAK, mbi Erion Veliajn janë ngritur akuzat për kryerjen e veprave penale “Korrupsioni pasiv i funksionarëve të lartë shtetërorë ose i të zgjedhurve vendorë”, kryer në bashkëpunim (9 herë) dhe “Pastrimi i produkteve të veprës penale ose veprimtarisë kriminal”.
