Presidenti rus Vladimir Putin ka thënë se vendi i tij nuk do t’i dorëzohet askujt për luftën në Ukrainë.
Në një fjalim drejtuar nënave dhe të vejave të ushtarëve rusë të vrarë ai tha se Rusisë i duhet një version i tillë paqeje që i përshtatët dhe do të sigurojë qetësi për një perspektivë të gjatë historike.
Kreu i Kremlinit theksoi se Rusia nuk do të pranojë të japë asgjë që i takon asaj.
“Ne nuk duam asgjë që i përket të tjerëve, por nuk do të japim asgjë që na takon neve. Ne kemi nevojë për opsionin që do të siguronte zhvillimin e qëndrueshëm të vendit tonë në kushte paqeje dhe sigurie.”
I pyetur nga nëna e një ushtari të rënë nëse Rusia do të tërhiqej, Putin tha se nuk kishte ndërmend ta bënte këtë. Rusia aktualisht kontrollon pak më pak se një të pestën e Ukrainës ose rreth 113,000 km katrorë.
Ndërkohë presidenti ukrainas Volodymyr Zelensky ka përsëritur deri vonë se Kievi nuk do të pranojë dorëzimin e territoreve ukrainase të pushtuara nga Rusia. Por retorika e tij ka filluar të ndryshojë pas përplasjes me presidentin amerikan Donald Trump dhe pasi SHBA i ndërpreu ndihmat Ukrainës.
Trump ndryshoi politikën perëndimore për luftën në Ukrainë, pasi hapi bisedimet dypalëshe me Moskën . Më parë Putin ka pranuar se është i hapur për çdo bisedim paqeje me Trump por pa bërë asnjë lëshim të madh territorial dhe ka përjashtuar anëtarësimin e Ukrainës në NATO.
