Partia Demokratike ka depozituar një padi në Gjykatën Kushtetuese për mandatin e deputetit socialist, Vullnet Sinaj, i cili akuzohet se ka shkelur Kushtetutën duke përfituar fonde publike nëpërmjet biznesit të tij.
Padia mësohet se është firmosur nga 14 deputetë të PD-së, teksa është depozituar në Kushtetuese, vetëm pak ditë para tejkalimit të afatit.
Ligji për funksionimin e Gjykatës Kushtetuese parashikon se “kërkesa për papajtueshmëri të funksionit të deputetit mund të paraqitet në Gjykatën Kushtetuese për sa kohë vazhdon mandati i deputetit, por jo më vonë se 6 muaj para përfundimit të mandatit…”.
Mandati i deputetëve aktualë të Kuvendit të Shqipërisë përfundon në shtator, kur edhe pritet të betohen 140 deputetët e rinj që do të dalin nga zgjedhjet parlamentare të 11 majit. Si rrjedhojë, mocioni i papajtueshmërisë së mandatit për deputetin Sinaj nuk mund të shqyrohet nga Gjykata Kushtetuese pas datës 10 mars.
Vullnet Sinaj më 30 Janar u mbrojt nga socialistët në Kuvend, të cilët votuan kundër dërgimit për interpretim në Gjykatën Kushtetuese të mandatit të kolegut të tyre.
Në një sallë gjysëm të boshatisur, mazhoranca e rrëzoi me 61 vota kundër dhe 12 abstenim projektvendimin “Për dërgimin e mocionit në Gjykatën Kushtetuese për konstatimin e papajtushmërisë dhe mbarimit të mandatit të deputetit Vullnet Sinaj“. Në mesin e votave kundër ishte dhe ajo e deputetit të PD-së, Bujar Leskaj.
Në mocionin e saj, opozita pretendoi se çështja e Vullnet Sinajt paraqet një rast të pastër të konfliktit të interesit krahasuar me rastet e tjera që janë shqyrtuar më herët nga gjykata.
Provat e sjella në mocion ishin disa fatura blerjesh nga institucione publike pranë rrjetit të supermarketeve “Big Market” në pronësi të Sinajt, që kapin shifrën 3.6 milionë lekë të reja (36 milion lekë të vjetra).
Gjatë seancave dëgjimore në Këshillin e Mandateve Sinaj nuk i pranoi akuzat duke i quajtur këto blerje rastësore, ndërsa avokatja e tij cilësoi provat e paraqitura në mocion si të pamjaftueshme për të provuar shkeljen e Kushtetutës nga deputeti.
Fakte dhe analiza/ Për disa miliona lekë, pse deputeti Vullnet Sinaj rrezikon mandatin
