Gjykata e Posaçme ka rrëzuar ankimimin e Erion Veliajt, i cili kishte bërë kërkesë për kthimin e celularit të sekuestruar.
Celulari Veliajt iu sekuestrua nga SPAK, në momentin kur u arrestua në Bashkinë e Tiranës, mesditën e 10 Shkurtit. Veliaj pretendonte se sekuestrimi i celularit ishte bërë në mënyrë të paligjshme, por pas përfundimit të seancës, GJKKO vendosi mospranimin e kërkesës së kryebashkiakut. Vendimi është marrë nga gjyqtari Erjon Bani.
Erion Veliaj akuzuohet për korrupsion në 9 raste dhe pastrim parash. Nga hetimi i SPAK ka rezultuar se Erion Veliaj dhe Ajola Xoxa kanë krijuar një skemë përfitimi ryshfetesh për pasurim personal përmes një numri organizatash dhe kompanish të kontrolluara prej tyre apo të afërmve të tyre dhe kanë përfituar së paku 1.1 milionë euro në nëntë raste. Veliaj akuzohet se ka përfituar tre vila në një fshat turistik në Qerret ndërsa Xoxa akuzohet se ka shpenzuar rreth 800 mijë euro në blerje online, të cilat nuk i ka deklaruar në deklaratat vjetore.
Që prej arrestimit, Erion Veliaj ka nisur një sulm me fyerje dhe kërcënime ndaj magjistratëve të çështjes së tij, prokurorit Ols Dado dhe gjyqtarit, Erjon Bani.
