Në orët e para të së hënës, Komisioni Qendror i Zgjedhjeve (KQZ) në Kosovë ka përditësuar rezultatet e votave me postë të numëruara deri më tani, të vlefshme për zgjedhjet e rregullta parlamentare që u mbajtën më 9 shkurt.
Me mbi 66 % të vendvotimeve të procesuara, Lëvizja Vetëvendosje prin me 52.72 %, e ndjekur nga Lidhja Demokratike e Kosovës me 29.8 %.
Sipas rezultateve të publikuara online nga autoritetet zgjedhore, në vendin e tretë gjendet Partia Demokratike e Kosovës me 7.98 %. Ndërsa, vendin e katërt e zë koalicioni mes Aleancës për Ardhmërinë e Kosovës dhe Nismës Socialdemokrate, me 3.32 %.
Rezultatet e votimit me postë
Me 66.31 % të votave me postë të procesuara, të vlefshme për zgjedhjet parlamentare të 9 shkurtit, Lëvizja Vetëvendosje prin garën me mbi 52 %, ndjekur nga Lidhja Demokratike e Kosovës.
Numërimi i votave me postë nisi më 28 shkurt dhe Komisioni Qendror i Zgjedhjeve ka thënë se ka aprovuar më shumë se 63.000 pako me fletëvotime.
Për votimet e 9 shkurtit, përveç votimit me postë, qytetarët janë vendit për herë të parë kanë mundur të votojnë edhe fizikisht në disa përfaqësi diplomatike.
Numërimi i votave nga përfaqësitë diplomatike ka përfunduar dhe sipas KQZ-së, LVV-ja mori më së shumti vota, përkatësisht 12.261 vota apo 80.71 %.
Votat nga përfaqësitë diplomatike
Numërimi ka përfunduar në 30 qendrat e votimit në përfaqësitë diplomatike të Kosovës për zgjedhjet parlamentare të 9 shkurtit. Lëvizja Vetëvendosje fitoi mbi 80 % të këtyre votave.
Pas përfundimit të numërimit të votave me postë do të vazhdojë numërimi i votave me kusht dhe i votave të personave me nevoja të veçanta, duke mundësuar certifikimin e rezultateve dhe hapjen e rrugës për formimin e institucioneve të reja.
Përveç votave nga përfaqësitë diplomatike, në Kosovë fillimisht ka përfunduar numërimi i votave të rregullta.
Sipas rezultateve preliminare të votimit të rregullt, Lëvizja Vetëvendosje është e para me 40.80 për qind të votave të fituara, pasuar nga Partia Demokratike e Kosovës me 22.05 %.
E treta ka dalë Lidhja Demokratike e Kosovës me 17.64 % të votave, pasuar nga Aleanca për Ardhmërinë e Kosovës me 7.46 % të votave të fituara.
Këto shifra tregojnë se asnjëra parti nuk ka mjaftueshëm vota për të formuar shumicën në Kuvendin me 120 ulëse të Kosovës. Nga partitë e komunitetit serb, më së shumti vota ka marrë Lista Serbe, përkatësisht 4.62 %./REL
