Janë zbardhur detaje të reja nga hetimet e Prokurorisë së Gjirokastrës për vetëvrasjen e 17-vjeçares Irsa Muçollari, nxënëse e klasës së 10-të C, në shkollën e mesme “Siri Shapllo”.
Burime për mediat bëjnë me dije se deri në këtë fazë të hetimeve janë marrë në pyetje rreth 30 persona, përfshirë prindërit, të afërmit, mësuesit dhe shokët e shkollës.
Mësohet se deri më tani nuk janë gjetur prova konkrete se bullizimi ka qenë shkak për këtë tragjedi. Prokuroria pret hapjen e telefonit të viktimës, pasi përmes komunikimeve të saj mund të hidhet dritë mbi të vërtetën.
Burime bëjnë me dije se sa i takon letrës që u gjet në sendet e vajzës, Prokuroria hedh poshtë aludimet se mund të ishte një letër lamtumire, që e mitura e kishte lënë përpara finalizimit të aktit ekstrem. Sipas tyre, letra ishte një detyrë shkollore në lëndën e gjuhës angleze, që vajza e ka realizuar gjatë kohës kur ishte nxënëse në sistemin 9-vjeçar.
Hetimet janë përqendruar edhe në ngjarjet e ndodhura në klasën e vajzës ditën kur kreu vetëvrasjen.
Mësohet se gjatë një oe mësimi, adoleshentja mbante mbi bankë telefonin e saj, ndërsa mësuesja i ka kërkuar ta hiqte atë. Vajza kishte shprehur kundërshtime ndaj mësueses, një ndryshim nga sjellja e saj e mëparshme, ku përshkruhet si person i qetë.
Gjithashtu, dy psikologë janë përfshirë në hetime për të analizuar ndikimet emocionale të të prekurave nga kjo tragjedi, ndërsa hetimet vijojnë.
