Analisti Mentor Kikia komentoi në Euronews, përplasjet e fundit mes politikës dhe sistemit të drejtësisë.
Sipas tij, sot, kur SPAK ka filluar të godasë pjesë të sojit të politikanëve, ata janë ngritur duke përdorur kauzat e njerëzve të thjeshtë dhe hallexhinjve që kanë vuajtur nga sistemi i drejtësisë, për të treguar se ky sistem ka probleme.
Ai theksoi se reagimet e politikës janë të vonuara dhe janë shfaqur vetëm kur SPAK ka filluar të godasë disa nga soji i tyre.
“Po dalin zbuluar shumë maskarallëqe në sistemin tonë juridiko-politik, sepse politikanët, dhe më konkretisht qeveria, po përdorin disa kauza për të treguar sa i keq është sistemi i drejtësisë. Sot, kemi arritur në një pikë ku armiku i armikut tim është miku im, sepse drejtësia është ajo që ka mbushur burgjet me hallexhinj. Dhe për ta justifikuar këtë lloj drejtësie, ata kanë mbajtur fjalime se shteti është i barabartë për të gjithë: kush nuk paguan, shkon në burg, kush shkel ligjin, shkon në burg.
Kikia tha se jemi në finale të përballjes mes politikës dhe drejtësisë dhe pavarësisht paketimit të produktit, sipas tij brenda është një bombë.
“Dikush e mbulon me gazeta të vjetra dhe është e shemtuar, dikush e mbulon me letër të bukur dhe fshinë me fjongo, por brenda ka bomba. Të dyja palët janë kundër SPAK-ut, i cili ka shumë mëkate dhe rreziqe për t’u shndërruar në polici gjyqësore, por politika është në hall të madh, sepse i ka vajtur uji te prapanica dhe po përpiqet të mbrohet me viktima. Vërtet. Viktimat e kësaj drejtësie, kur ishin viktima, nuk gjetën kurrë avokatin, as avokatin ligjor, as politik, as shtetëror”, tha Kikia.
Ai tha se tani, që duan ta sulmojnë drejtësinë, politikanët po i ngrejnë hallexhinjtë në pedestal dhe i quajnë heronjtë e ditës.
“Po kur ai që vrau veten në burg, sepse nuk kishte para për të paguar dritat dhe la tre fëmijë jetim, ku ishin këta? Përkundrazi, jo vetëm që mbyllën gojën, por edhe gojën e mediave që i kontrollojnë, dhe këto lajme u zëvendësuan me ceremoni përurimesh dhe tunele që hapeshin nga të gjitha anët. Ky lloj servilizmi politik, sot, u ka shpërthyer në derë, dhe ne kemi fatkeqësinë ta dëgjojmë. Ky është problemi dhe ne duhet të përpiqemi t’ua shpjegojmë të tjerëve se çfarë është kjo”, tha Kikia.
