Lideri i CDU/CSU, Friedrich Merz, ka shpallur fitoren në zgjedhjet parlamentare në Gjermani, duke theksuar se tani sfida kryesore është formimi i një qeverie të qëndrueshme.
“Kemi fituar zgjedhjet”, deklaroi ai pas publikimit të exit poll-eve.
Merz pranoi se procesi për krijimin e qeverisë nuk do të jetë i lehtë, por theksoi se duhet të ndodhë sa më shpejt.
“Duhet ta formojmë atë sa më parë me një shumicë të duhur parlamentare, sepse bota nuk na pret. Gjermania do të rikthehet të jetë e besueshme”, tha ai gjatë fjalimit të tij në Adenauer Haus, selia e partisë.
Lideri i CDU-së i bëri thirrje partive të tjera për dialog, duke nënvizuar se pas një fushate të fortë elektorale mbi çështjet ekonomike dhe emigracionin, tani është koha për bisedime.
“Tani duhet të flasim me njëri-tjetrin për të krijuar një qeveri që mund të veprojë”, shtoi Merz.
Sipas “exit poll-eve”, CDU/SCU parashikohet fituese me 29% të votave. Në vendin e dytë renditet partia e ekstremit të djathtë Alternativa për Gjermaninë (AfD) me 19.5% të votave. Siç duket ata kanë dyfishuar votat, pasi në vitin 2021 arritën të merrnin vetëm 10% të votave.
Ndërkohë, SPD në pushtet e kancelarit Olaf Scholz vjen e treta me 16% të votave dhe “Të Gjelbërit” në vendin e katërt me 13.5% të votave.
Nëse konfirmohen këto shifra, nuk është e qartë nëse Friedrich Merz i CDU/CSU mund të formojë një koalicion vetëm me një parti tjetër, Social Demokratët. Gjithçka mund të varet nga fakti nëse njëra nga partitë e tjera hyn në parlament apo jo. Nëse i duhet të gjejë një palë të tretë, mund të marrë kohë.
