Komisioni Europian ka deklaruar të enjten se zgjerimi i Unionit mbetet një prioritet për bllokun, proces me rëndësi gjeopolitike për paqen, sigurinë dhe stabilitetin për të gjithë kontinentin e Europës. Por nga ana tjetër, Brukseli ka pranuar se ky proces kërkon kohë.
I pyetur nga mediat, zëdhënësi për zgjerim i BE-së, Guillaume Mercier, nëse Komisioni do të jetë në gjendje të përshpejtojë anëtarësimin e Ukrainës apo të vendeve të Ballkanit pas situatës së krijuar të raporteve SHBA-BE, u shpreh se BE ka Planin e Rritjes si instrument për ta bërë këtë realitet.
“Zgjerimi është imperativ gjeopolitik dhe ndihmon që të kompletojë Unionin tonë. Kjo është një mundësi, një dritare për momentin për këto vende që t’i bashkohet BE-së. Është e rëndësishme të theksohet se në këtë kornizë, zgjerimi është një procedurë me një sërë hapash dhe këto masa duhet të zbatohen nga vendet e ndryshme që duan të anëtarësohen në BE”.
Mercier u pyet nga një gazetare edhe për qëndrimet kundër zgjerimit të qytetarëve brenda BE-së, duke u shprehur se ky është një proces që merr kohë, një numër i madh hapash duhet të përmbushën.
“Është një vendim që kërkon që shtetet anëtare të marrin një vendim unanim. Komisioni i ndihmon vendet që duan të aderojnë, duke i ndihmuar ata me reforma, si dhe reforma ekonomike”, u shpreh zëdhënësi për zgjerim i BE-së, Guillaume Mercier.
Ai përmendi që vendet duhet të mbyllin kapitujt dhe reformat duhet të ndërmerren. “Dhe kur të përfundojë kjo punë, në këtë fazë, një vendim duhet të merret nga të gjitha vendet anëtare”, shtoi ai.
