Greqia është tronditur sërish nga një tërmet mbrëmjen e djeshme me magitudë 4.7 ballë i Shkallës Rihter. Sipas Institutit Gjeodinamik, epiqendra e tërmetit ishte 12 kilometra në Perëndim të qytetit Kerias. Lëkundjet sizmike janë ndjerë edhe në Selanik duke shkaktuar kështu shqetësim për banorët.
Për të kuptuar më shumë rreth kësaj situate në Greqi, duke përfshirë dhe zonën e Santorinit, i ftuar në Euronews Albania ishte Alfred Fizi, aktivist i cili ndodhet në Greqi.
Ai tha se Greqia është vetë një vend sizmik, me lëkundje të shpeshta tërmeti, por këto lëkundje ditët e fundit japin një koncept të ndryshëm të situatës në Greqi.
“Në Greqi ndodhin lëkundje të shpeshta tërmeti. Është një gjendje e mësuar edhe pse këto ditë të fundit, tërmetet kanë shkaktuar shqetësim dhe trembje te banorët. Santorini është akoma në një gjendje kritike, janë mbyllur shkollat, bizneset dhe punonjësit janë larguar sidomos ato që janë sezonalë. Ky është një problem pasi lëkundjet vazhdojnë të jenë shumë të mëdha. Gjithsesi ka rënë numri i lëkundjeve dhe intensiteti i tyre. Santorini si një vend turistik do e ndjejë shumë këtë situatë pasi do ndikojë në pjesën e turizmit. Shumë shqiptarë janë larguar, disa kanë shkuar në Shqipëri, disa në Athinë. Shqiptarët janë punonjësit kryesorë sezonal. Ata kanë hedhur shumë lekë, kanë investuar dhe është e ndjeshme shumë si situatë për ta në jetën e përditshme dhe në ekonomi”, tha Alfred Fizi.
